Vazirlar Mahkamasining qarori bilan bir qator hukumat qarorlariga o‘zgartirishlar kiritildi va shu tariqa tadbirkorlik subyektlariga yer uchastkalari ajratish tartibotlari soddalashtirildi, deb yozadi Norma.
Vazirlar Mahkamasining 2009-yildagi qarori bilan Toshkent viloyatida yuridik va jismoniy shaxslarga shaharsozlik normalari va qoidalariga muvofiq yer uchastkalari ajratish amaliyotini o‘rganish komissiyasi tuzilgan. Komissiya o‘ziga Toshkent viloyati hokimligi tomonidan berilgan hujjatlarni o‘rganib chiqib, tadbirkorlik faoliyati, yakka tartibdagi uy-joy qurilishi va boshqa maqsadlar uchun Toshkent viloyatida yer uchastkalari ajratish bo‘yicha qarorlar qabul qiladi.
Bu ancha uzoq davom etadigan jarayon: hujjatlar o‘n kun ichida ko‘rib chiqiladi, so‘ng uch kunlik muddatda Toshkent viloyat hokimligiga qabul qilingan qaror haqida bayonnoma yuboriladi. Komissiya ijobiy qaror qabul qilgan taqdirdagina tuman (shahar) hokimi bir hafta muddatda yer ajratish haqida qaror chiqaradi.
Qabul qilingan tuzatishlar natijasida ushbu mexanizm Toshkent viloyatining Qibray, Zangiota, Toshkent, Bo‘stonliq va Parkent tumanlaridagina saqlanib qoladi. Qolgan o‘nta tumanda yer uchastkasini Komissiya qarorisiz ham olish mumkin.
Avvalroq Toshkent viloyatining ayrim aholi punktlarida jismoniy va yuridik shaxslarga qurilish uchun yer maydonlarini sotishga vaqtinchalik taqiq o‘rnatilgani xabar berilgan edi.
Izoh (0)