Shavkat Mirziyoyev sobiq mudofaa vaziri Qobul Berdiyevni keskin tanqid qildi (video)

10-yanvar kuni O‘zbekiston Prezidenti huzuridagi Xavfsizlik kengashining majlisida Shavkat Mirziyoyev sobiq mudofaa vaziri Qobul Berdiyevni tanqid qildi. Prezident sobiq mudofaa vaziri eski usullarda ishlagani, mas’uliyatdan qochgani, qog‘ozbozlikka berilib ketganini ma’lum qildi.

Prezident Mudofaa vazirligidagi ko‘plab mansabdor shaxslar ishonchni oqlamagani, o‘zlarini ko‘rsatishda sustkashlikka yo‘l qo‘ygani, ularda tashabbus yo‘qligi, mustaqil qarorlar qabul qilish va mas’uliyatni o‘ziga olishga tayyor emasligi endilikda Mudofaa vazirligi oldiga keskin talablar qo‘yilishiga sabab bo‘lishini aytib o‘tdi.

Eng katta muammo — “sen menga tegma, men senga tegmayman” iborasiga o‘tib olib, hech kim o‘ziga mas’uliyatni olmagan. Bunday kamchiliklarni sobiq mudofaa vaziri Berdiyev faoliyatining natijasi desam xato bo‘lmaydi.

Ochiq aytish kerak, u asosan eski usullar bilan ishladi, mutlaqo keraksiz qog‘ozbozlikka berilib ketgan edi. U qo‘shinlar bilan muntazam aloqa o‘rnatmagan, harbiy kadrlar tayyorlash masalasiga mutlaqo e’tibor qaratmagan, zarur hollarda mustaqil qaror qabul qilishda unga qat’iyat yetishmagan. Vazirga berilgan baho — butun mudofaa vazirligiga berilgan baho, milliy xavfsizlik kengashimizga berilgan baho. O‘rtoq Mahmudov (Prezident huzuridagi Xavfsizlik kengashi kotibi Viktor Mahmudov — “Daryo” izohi) ham bundan xulosa qilishi kerak.

Afsuski, buning oqibatida bizda ko‘p hollarda harbiy boshliqlar tepadan buyruq kutib o‘tirishga o‘rganib qoldi. Yana bir bor takrorlab aytaman: har bir komandir va qo‘mondon o‘z harbiy qismi va okrugining sharoitidan, mavjud jangovar vaziyatdan kelib chiqqan holda tezkorlik bilan har tomonlama asoslangan, mustaqil qaror qabul qilishga qodir bo‘lishi shart.

Shavkat Mirziyoyev, O‘zbekiston Prezidenti