Шавкат Мирзиёев собиқ мудофаа вазири Қобул Бердиевни кескин танқид қилди (видео)

10 январь куни Ўзбекистон Президенти ҳузуридаги Хавфсизлик кенгашининг мажлисида Шавкат Мирзиёев собиқ мудофаа вазири Қобул Бердиевни танқид қилди. Президент собиқ мудофаа вазири эски усулларда ишлагани, масъулиятдан қочгани, қоғозбозликка берилиб кетганини маълум қилди.

Президент Мудофаа вазирлигидаги кўплаб мансабдор шахслар ишончни оқламагани, ўзларини кўрсатишда сусткашликка йўл қўйгани, уларда ташаббус йўқлиги, мустақил қарорлар қабул қилиш ва масъулиятни ўзига олишга тайёр эмаслиги эндиликда Мудофаа вазирлиги олдига кескин талаблар қўйилишига сабаб бўлишини айтиб ўтди.

Энг катта муаммо — «сен менга тегма, мен сенга тегмайман» иборасига ўтиб олиб, ҳеч ким ўзига масъулиятни олмаган. Бундай камчиликларни собиқ мудофаа вазири Бердиев фаолиятининг натижаси десам хато бўлмайди.

Очиқ айтиш керак, у асосан эски усуллар билан ишлади, мутлақо кераксиз қоғозбозликка берилиб кетган эди. У қўшинлар билан мунтазам алоқа ўрнатмаган, ҳарбий кадрлар тайёрлаш масаласига мутлақо эътибор қаратмаган, зарур ҳолларда мустақил қарор қабул қилишда унга қатъият етишмаган. Вазирга берилган баҳо — бутун мудофаа вазирлигига берилган баҳо, миллий хавфсизлик кенгашимизга берилган баҳо. Ўртоқ Маҳмудов (Президент ҳузуридаги Хавфсизлик кенгаши котиби Виктор Маҳмудов — «Дарё» изоҳи) ҳам бундан хулоса қилиши керак.

Афсуски, бунинг оқибатида бизда кўп ҳолларда ҳарбий бошлиқлар тепадан буйруқ кутиб ўтиришга ўрганиб қолди. Яна бир бор такрорлаб айтаман: ҳар бир командир ва қўмондон ўз ҳарбий қисми ва округининг шароитидан, мавжуд жанговар вазиятдан келиб чиққан ҳолда тезкорлик билан ҳар томонлама асосланган, мустақил қарор қабул қилишга қодир бўлиши шарт.

Шавкат Мирзиёев, Ўзбекистон Президенти