Rossiya prokuraturasi ilk bor suddan narkosavdo haqidagi ish bo‘yicha umrbod qamoq jazosi so‘radi. Bu haqda Bosh prokuratura rasmiy vakili Aleksandr Kurennoy ma’lum qildi, deya xabar beradi Meduza.
Gap Tojikistonning 15 fuqarosidan iborat guruhga qarshi ish haqida ketmoqda. Tergovga ko‘ra, asosiy ayblanuvchisi Sherali Tabarov bo‘lgan guruh 2012—2015-yillar davomida Rossiyaga jami hisobda 600 kilogramm geroin olib kirgan.
Tabarov oldinroq narkotiklar aylanmasi bilan shug‘ullangani uchun 10 yil qamoq jazosiga hukm qilingan va Tojikistonga topshirilgandi. U Rossiyaga qalbaki pasport bilan qaytgani bildirilmoqda.
Tabarovga qarshi jinoiy guruh tuzish, kontrabanda va narkotiklarning noqonuniy savdosi bo‘yicha ayblovlar ilgari surildi. Oxirgi ikki modda uchun 2012-yildan beri umrbod qamoq jazosi berilishi ko‘zda tutilgan, biroq shu paytgacha qo‘llanmagandi.
Mazkur jinoiy ish bo‘yicha hukm 18-dekabr kuni e’lon qilinadi.
Izoh (0)