Россия прокуратураси илк бор суддан наркосавдо ҳақидаги иш бўйича умрбод қамоқ жазоси сўради. Бу ҳақда Бош прокуратура расмий вакили Александр Куренной маълум қилди, дея хабар беради Meduza.
Гап Тожикистоннинг 15 фуқаросидан иборат гуруҳга қарши иш ҳақида кетмоқда. Терговга кўра, асосий айбланувчиси Шерали Табаров бўлган гуруҳ 2012—2015 йиллар давомида Россияга жами ҳисобда 600 килограмм героин олиб кирган.
Табаров олдинроқ наркотиклар айланмаси билан шуғуллангани учун 10 йил қамоқ жазосига ҳукм қилинган ва Тожикистонга топширилганди. У Россияга қалбаки паспорт билан қайтгани билдирилмоқда.
Табаровга қарши жиноий гуруҳ тузиш, контрабанда ва наркотикларнинг ноқонуний савдоси бўйича айбловлар илгари сурилди. Охирги икки модда учун 2012 йилдан бери умрбод қамоқ жазоси берилиши кўзда тутилган, бироқ шу пайтгача қўлланмаганди.
Мазкур жиноий иш бўйича ҳукм 18 декабрь куни эълон қилинади.
Изоҳ (0)