Rossiya prezidenti Vladimir Putin 2018-yilgi prezident saylovida nomzod sifatida qatnashishini e’lon qildi. Bu haqda Meduza xabar bermoqda.
Putin 6-dekabr kuni Nijniy Novgorodda Gorkiy avtomobil zavodining 85 yilligiga bag‘ishlangan miting-konsertda ishtirok etgan.
“Men Rossiya Federatsiyasi prezidenti lavozimi uchun o‘z nomzodimni ilgari suraman. Bu haqda e’lon qilish uchun bundan-da yaxshiroq joy va sabab, ehtimol, bo‘lmasa kerak”, — dedi Putin.
Putin o‘z qarori haqida zavod xodimlaridan birining savoliga javob berayotganida ma’lum qildi. “Bugun bu zaldagi hamma-hamma sizni qo‘llab-quvvatlaydi. Vladimir Vladimirovich, bizga sovg‘a ulashing — o‘z qaroringizni e’lon qiling, axir biz siz tarafmiz, GAZ — sizning tarafdoringiz”, — dedi zavod ishchisi.
“RBK”ning qo‘shimcha qilishicha, agar Putin 2018-yilgi prezident saylovida g‘olib chiqsa, 2024-yilga borib u umumiy hisobda 21 yil Rossiya davlat rahbari lavozimida ishlagan bo‘ladi.
Nijniy Novgoroddagi miting arafasida, 6-dekabr kuni Putin “Rossiya ko‘ngillisi — 2017” taqdimot marosimida qatnashgan edi. Navbatdagi muddatga o‘z nomzodini qo‘yish-qo‘ymasligi haqidagi savolga Putin bu borada yaqin vaqt ichida qaror qabul qilishini aytib o‘tgan edi. Ayni vaqtda, Rossiya prezideti zalda yig‘ilganlardan ular Putinni qo‘llab-quvvatlashga qanchalik tayyor ekani haqida so‘ragan. Yig‘ilganlar “Ha-a-a!” deb qichqirib, qarsaklar bilan javob bergan.
2017-yil davomida Putindan uning saylovda qatnashish-qatnashmasligi haqida muntazam so‘rab kelishdi. Rossiya prezidenti har safar aniq javob berishdan qochardi. Buning o‘rniga u hatto latifalar aytib bergan vaqtlar ham bo‘ldi.
Avvalroq “RBK”ning uch manbasi Putin saylovga o‘z nomzodini qo‘yishi haqida, katta ehtimol bilan, “Birlashgan Rossiya” (“Yedinaya Rossiya”) partiyasining 22—23-dekabrga belgilangan qurultoyigacha e’lon qilishi haqida axborot bergan edi.
“RBK” suhbatdoshlarining qayd etishicha, Putinning saylovoldi tashviqoti imkon qadar qisqa bo‘ladi va, saylovda uning g‘olib chiqishiga hech qanday shubha bo‘lmagani sababli, uning nomzodi qo‘yilishi haqidagi axborotni e’lon qilishda shoshilishga hojat yo‘q.
2018-yilgi Rossiya prezidenti saylovida, Putindan tashqari, Rossiya liberal-demokratik partiyasi (RLDP) raisi Vladimir Jirinovskiy, Rossiya Kommunistik partiyasi (RFKP) yetakchisi Gennadiy Zyuganov, “Yabloko” partiyasi asoschilaridan biri Grigoriy Yavlinskiy, “O‘sish partiyasi” yetakchisi Boris Titov, jurnalist Kseniya Sobchak nomzod sifatida ishtirok etish istagini bildirgan.
Eng faol saylovoldi tashviqoti esa Aleksey Navalniy tomonidan olib borilmoqda. U 2017-yil sentabridan beri Rossiya hududlarida muntazam ravishda mitinglar o‘tkazmoqda. Rossiya Markaziy saylov komissiyasi Navalniy muqaddam sudlangani sababli, prezidentlikka o‘z nomzodini qo‘ya olmasligini ma’lum qilgan bo‘lsa-da, Navalniy mamlakat konstitutsiyasiga asoslanib, bunday taqiq noqonuniyligini ta’kidlamoqda.
Ma’lumot uchun, Rossiya prezidenti saylovi 2018-yil 18-mart kuni bo‘lib o‘tadi. Prezident olti yil muddatga saylanadi.
Izoh (0)