Россия президенти Владимир Путин 2018 йилги президент сайловида номзод сифатида қатнашишини эълон қилди. Бу ҳақда Meduza хабар бермоқда.
Путин 6 декабрь куни Нижний Новгородда Горкий автомобиль заводининг 85 йиллигига бағишланган митинг-концертда иштирок этган.
«Мен Россия Федерацияси президенти лавозими учун ўз номзодимни илгари сураман. Бу ҳақда эълон қилиш учун бундан-да яхшироқ жой ва сабаб, эҳтимол, бўлмаса керак», — деди Путин.
Путин ўз қарори ҳақида завод ходимларидан бирининг саволига жавоб бераётганида маълум қилди. «Бугун бу залдаги ҳамма-ҳамма сизни қўллаб-қувватлайди. Владимир Владимирович, бизга совға улашинг — ўз қарорингизни эълон қилинг, ахир биз сиз тарафмиз, ГАЗ — сизнинг тарафдорингиз», — деди завод ишчиси.
«РБК»нинг қўшимча қилишича, агар Путин 2018 йилги президент сайловида ғолиб чиқса, 2024 йилга бориб у умумий ҳисобда 21 йил Россия давлат раҳбари лавозимида ишлаган бўлади.
Нижний Новгороддаги митинг арафасида, 6 декабрь куни Путин «Россия кўнгиллиси — 2017» тақдимот маросимида қатнашган эди. Навбатдаги муддатга ўз номзодини қўйиш-қўймаслиги ҳақидаги саволга Путин бу борада яқин вақт ичида қарор қабул қилишини айтиб ўтган эди. Айни вақтда, Россия президети залда йиғилганлардан улар Путинни қўллаб-қувватлашга қанчалик тайёр экани ҳақида сўраган. Йиғилганлар «Ҳа-а-а!» деб қичқириб, қарсаклар билан жавоб берган.
2017 йил давомида Путиндан унинг сайловда қатнашиш-қатнашмаслиги ҳақида мунтазам сўраб келишди. Россия президенти ҳар сафар аниқ жавоб беришдан қочарди. Бунинг ўрнига у ҳатто латифалар айтиб берган вақтлар ҳам бўлди.
Аввалроқ «РБК»нинг уч манбаси Путин сайловга ўз номзодини қўйиши ҳақида, катта эҳтимол билан, «Бирлашган Россия» («Единая Россия») партиясининг 22—23 декабрга белгиланган қурултойигача эълон қилиши ҳақида ахборот берган эди.
«РБК» суҳбатдошларининг қайд этишича, Путиннинг сайловолди ташвиқоти имкон қадар қисқа бўлади ва, сайловда унинг ғолиб чиқишига ҳеч қандай шубҳа бўлмагани сабабли, унинг номзоди қўйилиши ҳақидаги ахборотни эълон қилишда шошилишга ҳожат йўқ.
2018 йилги Россия президенти сайловида, Путиндан ташқари, Россия либерал-демократик партияси (РЛДП) раиси Владимир Жириновский, Россия Коммунистик партияси (РФКП) етакчиси Геннадий Зюганов, «Яблоко» партияси асосчиларидан бири Григорий Явлинский, «Ўсиш партияси» етакчиси Борис Титов, журналист Ксения Собчак номзод сифатида иштирок этиш истагини билдирган.
Энг фаол сайловолди ташвиқоти эса Алексей Навальний томонидан олиб борилмоқда. У 2017 йил сентябридан бери Россия ҳудудларида мунтазам равишда митинглар ўтказмоқда. Россия Марказий сайлов комиссияси Навальний муқаддам судлангани сабабли, президентликка ўз номзодини қўя олмаслигини маълум қилган бўлса-да, Навальний мамлакат конституциясига асосланиб, бундай тақиқ ноқонунийлигини таъкидламоқда.
Маълумот учун, Россия президенти сайлови 2018 йил 18 март куни бўлиб ўтади. Президент олти йил муддатга сайланади.
Изоҳ (0)