Buyuk Britaniyada kartochkalar orqali bitkoinlarni naqdlashtirish imkoni paydo bo‘ldi

London Block Exchange kompaniyasi Buyuk Britaniyadagi do‘konlarda kriptolvalyutalar yordamida xaridni amalga oshirishga yordam beruvchi yangi debet kartalarini taqdim etdi. Bundan tashqari uning yordamida bankomatlardan pullarni naqdlashtirib olish ham mumkin, deb xabar berdi Business Insider.

Dragoncard kartasini ishlatish uchun foydalanuvchi o‘zining smartfoniga maxsus dasturni yuklab olishi hamda unga “virtual hamyon”ni ulashi kerak. Tizim bitkoin, efirium, rippl, monero kabi valyutalarda ishlaydi.

London Block Exchange loyihasini amalga oshirish uchun xususiy sarmoyadorlardan ikki million funt sterling yig‘ildi. Ularning ismi oshkor etilmadi.

Kriptovalyutani naqdlashtirish uchun 0,5 foiz komissiya to‘lovi olib qolinadi. Shuningdek, kartani sotib olish uchun 20 funt to‘lanadi.