Rossiya prezidenti Vladimir Putin tan olinmagan Donetsk va Lugansk tuzilmalari rahbarlari bilan muzokaralar o‘tkazishini ma’lum qildi. Bu haqda “RBK” xabar bermoqda.
Aytilishicha, muzokaralar davomida “Ukraina tanlovi — xalq huquqi” harakati yetakchisi Viktor Medvedchuk bildirgan asirlarni almashish taklifi ko‘rib chiqiladi.
Oldin Putinning ayirmachilar rahbarlari bilan to‘g‘ridan-to‘g‘ri muzokaralari haqida ma’lum qilinmagan.
Medvedchuk va Putinning uchrashuvi Moskva viloyatidagi Istra shahrida prezidentning Novo-Iyerusalim erkaklar ibodatxonasiga tashrifi chog‘ida bo‘lib o‘tdi.
Medvedchuk Putinga Ukraina Donbassda asirlar almashish doirasida 300 kishini ozod qilishga tayyorligini bildirdi. Kiyev ayirmachilar Yangi yilga qadar 70 kishini ozod qilishini kutmoqda.
“Sizga murojaat qilib, insonparvarlik namoyish qilishingizni hamda tan olinmagan respublikalar yetakchilari Zaxarchenko va Plotnitskiylarga murojaat etib, almashinuvning birinchi bosqichi sifatida shu ayirboshni o‘tkazishingizni va ko‘rsatilgan shaxslarni ozod qilishingizni so‘rayman”, — dedi Medvedchuk Putinga.
Izoh (0)