O‘zbekiston Prezidenti Shavkat Mirziyoyev 9-noyabr kuni BMT bosh kotibining siyosiy masalalar bo‘yicha yordamchisi Miroslav Yencha va bosh kotibning maxsus vakili, Markaziy Osiyoda preventiv diplomatiya bo‘yicha mintaqaviy markazi rahbari Natalya Germanni qabul qildi, deya xabar bermoqda O‘zA.
Prezident Mirziyoyev 10-noyabr kuni Samarqandda ish boshlaydigan “Markaziy Osiyo: yagona tarix va umumiy kelajak, barqaror rivojlanish va taraqqiyot yo‘lidagi hamkorlik” mavzuidagi xalqaro konferensiyani tashkil etishda BMT muhim o‘rin tutganini ta’kidladi.
“O‘zbekiston jahon hamjamiyatining teng huquqli a’zosi sifatida xalqaro jarayonlarda faol ishtirok etayotgani, jumladan, yig‘ilib qolgan masalalarga amaliy yechim topish, Markaziy Osiyoda xavfsizlik va barqarorlikni mustahkamlash, mintaqaning uzoq istiqbolga mo‘ljallangan taraqqiyoti bo‘yicha aniq takliflar ilgari surayotgani va amalga oshirayotgani ta’kidlandi”, — deb yozadi O‘zA.
Mehmonlar BMT va uning bosh kotibi Antoniu Guterrish nomidan mintaqada xavfsizlik va barqaror rivojlanishni ta’minlash bo‘yicha o‘tkazilayotgan xalqaro forum maqsadi va vazifalarini qo‘llab-quvvatlashini bildirdi.
Uchrashuvda, shuningdek, O‘zbekiston va BMT o‘rtasidagi hamkorlikni kengaytirish va mustahkamlashga doir boshqa masalalar muhokama qilindi.
Izoh (0)