Ўзбекистон Президенти Шавкат Мирзиёев 9 ноябрь куни БМТ бош котибининг сиёсий масалалар бўйича ёрдамчиси Мирослав Енча ва бош котибнинг махсус вакили, Марказий Осиёда прeventив дипломатия бўйича минтақавий маркази раҳбари Наталя Германни қабул қилди, дея хабар бермоқда ЎзА.
Президент Мирзиёев 10 ноябрь куни Самарқандда иш бошлайдиган «Марказий Осиё: ягона тарих ва умумий келажак, барқарор ривожланиш ва тараққиёт йўлидаги ҳамкорлик» мавзуидаги халқаро конференцияни ташкил этишда БМТ муҳим ўрин тутганини таъкидлади.
«Ўзбекистон жаҳон ҳамжамиятининг тенг ҳуқуқли аъзоси сифатида халқаро жараёнларда фаол иштирок этаётгани, жумладан, йиғилиб қолган масалаларга амалий ечим топиш, Марказий Осиёда хавфсизлик ва барқарорликни мустаҳкамлаш, минтақанинг узоқ истиқболга мўлжалланган тараққиёти бўйича аниқ таклифлар илгари сураётгани ва амалга ошираётгани таъкидланди», — деб ёзади ЎзА.
Меҳмонлар БМТ ва унинг бош котиби Антониу Гутерриш номидан минтақада хавфсизлик ва барқарор ривожланишни таъминлаш бўйича ўтказилаётган халқаро форум мақсади ва вазифаларини қўллаб-қувватлашини билдирди.
Учрашувда, шунингдек, Ўзбекистон ва БМТ ўртасидаги ҳамкорликни кенгайтириш ва мустаҳкамлашга доир бошқа масалалар муҳокама қилинди.
Изоҳ (0)