“Peshmerga” otryadlarining rasmiy vakili Jabbor Yavarning ma’lum qilishicha, kurd qurolli kuchlari Kirkuk viloyatini tark etish borasida Bag‘doddan hech qanday rasmiy ultimatum olmagan. Yavarning so‘zlariga ko‘ra, bu turdagi ultimatumlar Iroq armiyasi mahalliy qo‘mondonlari darajasida e’lon qilingan bo‘lishi mumkin, biroq markaziy qo‘mondonlik bu talabni ilgari surmagan va Iroq fuqarolariga nisbatan kuch ishlatmaslikka va’da bergan, deb xabar beradi “Kommersant”.
Shuningdek, Jabbor Yavarning ma’lum qilishicha, kurd hukumati Kirkukka hech qanday qo‘shimcha kuchlarni jalb etish niyatida emas. “Hech qanday mobilizatsiya yo‘q. Ha, bizning IShIDga qarshi ming kilometrdan uzunroq mudofaa chizig‘imiz mavjud. Ushbu chiziq o‘z holicha qolgan va ba’zida kuchlarning harakatiga qarab o‘zgartirib turiladi, biroq bu chiziqqa yangi kuchlar o‘rnashgani yo‘q”, — deydi Yavar.
Avvalroq, Iroq hukumati kurd qurolli kuchlaridan Kirkuk viloyatini 48 soat ichida tark etishini talab qilgani haqida xabarlar tarqalgandi.
Iroq prezidenti matbuot xizmatining tasdiqlashicha, Fuad Ma’sum (Iroq prezidenti) kurd yetakchilari bilan Sulaymoniya borasida muzokaralar o‘tkazgan, biroq OAVlar tomonidan Bag‘dod rasmiy hukumati nomidan ultimatum berilgani borasida tarqatilgan xabarlarni mutlaqo rad etgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)