O‘zbekistonda o‘t o‘chiruvchilarga reyting baholari natijasiga qarab pul mukofotlari beriladi

Vazirlar Mahkamasining 27-sentabrdagi qarori bilan Davlat yong‘in xavfsizligi xizmatining yong‘in xavfsizligi inspektorlarini, shuningdek, yong‘inlarni o‘chirish bo‘linmalarining safdorlari tarkibi va xizmatchilarini pul mukofoti bilan taqdirlash tartibi to‘g‘risidagi nizom tasdiqlandi, deb yozadi Norma.

Hujjatda qayd etilishicha, yuksak kasb mahoratini namoyish qilayotgan va yong‘inlarning oldini olish va o‘chirishga salmoqli hissa qo‘shayotgan xodimlar quyidagi tartibda mukofotlanadi:

• yong‘in xavfsizligi inspektorlari — har chorak yakuni bo‘yicha bir lavozim maoshi miqdorigacha miqdorda biryo‘la pul mukofoti bilan;
• yong‘inlarni o‘chirish bo‘linmalarining safdorlari tarkibi va xizmatchilari — yil yakunlari bo‘yicha bir lavozim maoshigacha miqdorda biryo‘la pul mukofoti bilan.

Yong‘in xavfsizligi inspektorlarining kasbiy yaroqliligini baholashning reyting tizimi Ichki ishlar vazirligi tomonidan belgilanadi.

Muayyan ko‘rsatkichlardan kelib chiqib, moddiy taqdirlashning quyidagi toifalari belgilanadi:

• 1-toifa — lavozim maoshining 100 foizi miqdorida;
• 2-toifa — lavozim maoshining 50 foizi miqdorida.