АҚШ Конгрессининг Вакиллар палатаси ҳайдовчисиз ҳаракатланадиган автомобилларни татбиқ этишни янада тезлаштиришга қаратилган қонун лойиҳасини маъқуллади. Бу ҳақда Meduza хабар бермоқда.
Бунда гап ҳайдовчисиз бошқариладиган автомобиллар технологиясини татбиқ этишни федерал даражада қўллаб-қувватловчи илк ҳужжат ҳақида бормоқда.
Конгресс томонидан бир овоздан маъқулланган қонун лойиҳаси штатлар маъмуриятига ўз ҳудудида ҳайдовчисиз ҳаракатланадиган автомобилларни тақиқлашни тақиқлайди.
Мазкур ҳужжат Ҳаракат хавфсизлиги бўйича миллий бошқармага ҳар йили 25 мингтагача ҳайдовчисиз ҳаракатланадиган автомобилга синов тариқасида ҳаракатланиш учун рухсатнома беришга рухсат беради. Кейинчалик мазкур квотани йилига 100 мингтагача кўпайтириш режалаштирилган.
Вакиллар палатаси томонидан маъқулланган қонун лойиҳаси Сенатга юборилган. Ҳужжатнинг АҚШ Конгресси юқори палатасидаги муҳокамаси, тахминларга кўра, сентябрь ойи ўрталарида бошланади.
АҚШнинг амалдаги қонунчилиги ҳайдовчисиз автомобиллар ҳаракатини федерал даражада тартибга солмайди. Ҳозирги вақтда ҳар бир штат бу масалада ўз қоидаларини ўзи белгиламоқда.
Автомобиль ишлаб чиқарувчи корхоналар Ҳаракат хавфсизлиги бўйича миллий бошқармадан ҳайдовчисиз машиналарни синовдан ўтказиш учун рухсат олиши керак, чунки бундай машиналар амалдаги стандартларга мос келмайди. Ҳозирги вақтда йилига фақат 2,5 мингта машина бундай рухсатнома олиши мумкин.
Ҳайдовчисиз автомобилларни яратиш лойиҳалари устида бир вақтнинг ўзида бир неча йирик компаниялар, хусусан, Tesla, Uber Technologies ва Alphabet иш олиб бормоқда.
Изоҳ (0)