O‘zbekiston davlat jahon tillari universiteti (O‘zDJTU)da 7-sentabr kuni “My First President” nomli ingliz tilidagi insholar to‘plamining taqdimoti o‘tkazildi. Bu haqda “Daryo” muxbiri Madina Nurman ma’lum qildi.
O‘zbekiston Birinchi Prezidenti Islom Karimov nomidagi Ilmiy-ma’rifiy memorial majmua, Islom Karimov respublika xayriya jamoat fondi, Oliy va o‘rta maxsus ta’lim vazirligi, O‘zDJTU hamda “O‘zbekistonda xorijiy tillar” ilmiy-metodik elektron jurnali va portali tomonidan tashkil etilgan tadbirda Islom Karimovning rafiqasi Tatyana Karimova ham ishtirok etdi.
Birinchi Prezident Islom Karimov xotirasiga bag‘ishlab tashkil etilgan tanlov doirasida oliy, o‘rta maxsus, kasb-hunar ta’lim muassasalarining talabalari, maktab o‘quvchilaridan 500 dan ziyod insholar kelib tushdi, ularning 36 tasi to‘plamga kiritildi.
Tadbir doirasida O‘zbekiston Respublikasining Birinchi Prezidenti hayoti va faoliyatiga bag‘ishlangan fotoko‘rgazma tashkil qilindi. Shuningdek, tadbir ishtirokchilariga “Birinchi Prezident va yoshlar” deb nomlangan rolik ham namoyish etildi.
Taqdimot yakunida tanlov g‘oliblarini taqdirlash marosimi o‘tkazilib, ularga maxsus diplomlar va sovg‘alar topshirildi.
Izoh (0)