Ўзбекистон давлат жаҳон тиллари университети (ЎзDJТУ)да 7 сентябрь куни «My First President» номли инглиз тилидаги иншолар тўпламининг тақдимоти ўтказилди. Бу ҳақда «Дарё» мухбири Мадина Нурман маълум қилди.
Ўзбекистон Биринчи Президенти Ислом Каримов номидаги Илмий-маърифий мемориал мажмуа, Ислом Каримов республика хайрия жамоат фонди, Олий ва ўрта махсус таълим вазирлиги, ЎзDJТУ ҳамда «Ўзбекистонда хорижий тиллар» илмий-методик электрон журнали ва портали томонидан ташкил этилган тадбирда Ислом Каримовнинг рафиқаси Татьяна Каримова ҳам иштирок этди.
Биринчи Президент Ислом Каримов хотирасига бағишлаб ташкил этилган танлов доирасида олий, ўрта махсус, касб-ҳунар таълим муассасаларининг талабалари, мактаб ўқувчиларидан 500 дан зиёд иншолар келиб тушди, уларнинг 36 таси тўпламга киритилди.
Тадбир доирасида Ўзбекистон Республикасининг Биринчи Президенти ҳаёти ва фаолиятига бағишланган фотокўргазма ташкил қилинди. Шунингдек, тадбир иштирокчиларига «Биринчи Президент ва ёшлар» деб номланган ролик ҳам намойиш этилди.
Тақдимот якунида танлов ғолибларини тақдирлаш маросими ўтказилиб, уларга махсус дипломлар ва совғалар топширилди.
Изоҳ (0)