O‘zbekiston Axborot texnologiyalari va kommunikatsiyalarini rivojlantirish vaziri Sherzod Shermatov Facebook’dagi sahifasida barchani “kunning asosiy yangiligi” bilan tabrikladi. U Prezidentning “Valyuta siyosatini erkinlashtirish bo‘yicha dastlabki choralar to‘g‘risida”gi farmonini so‘nggi vaqtlardagi eng muhim hujjatlardan biri deb atadi.
“Endi barcha tarmoqlar kursdagi farq tufayli tariflar asossiz tarzda oshib ketishi oldini olish uchun choralar ko‘rishi zarur. Mana, masalan, Toshkent shahridagi Inha universitetida o‘qish Markaziy bank kursi bo‘yicha 5000 dollar. Hozirgi kurs bo‘yicha 1 AQSh dollari 4210 so‘mga teng. So‘mda bu 21 million bo‘ladi. Sarosima va tushunmovchiliklar bo‘lmasligi uchun ushbu semestrda kurs o‘zgarishidan qat’i nazar so‘mdagi aynan shu qiymatni belgilab qo‘yish kerak. Universitet xarajatlari ko‘payishi — tushunarli holat (chunki chet ellik o‘qituvchilar dollarda maosh oladi), ammo biz birinchi navbatda abituriyentlar va ularning ota-onalari uchun sharoitlar yaratishimiz kerak”, — deb yozdi vazir.
Sherzod Shermatov xuddi shu tamoyilni barcha operatorlar va provayderlar ham qo‘llashi kerakligini qo‘shimcha qildi. “Buni hali yana alohida muhokama qilamiz”, — deya qayd etdi u.
Izoh (0)