Shavkat Mirziyoyev: Bekobod—Olmaliq musobaqasida g‘olib chiqqan shahar rahbarlariga avtomobillar sovg‘a qilinadi (video)

18-avgust kuni Bekobod shahrida tashrif bilan bo‘lgan O‘zbekiston Prezidenti Shavkat Mirziyoyev bu shahar bilan Toshkent viloyatining boshqa bir sanoat nuqtasi — Olmaliq shahri o‘rtasida musobaqa o‘tkazishni taklif qildi.

Shavkat Mirziyoyev musobaqa davomida har ikkala shahar vakillari ma’lum muddat ichida raqobatchisining mehmoni bo‘lib, unda bo‘layotgan o‘zgarishlar bilan tanishishi va o‘rganib borishi maqsadga muvofiq ekanini ta’kidladi.

Bekobod haqida gap ketganda, bir tashabbus bor. Yaqinda Olmaliq shahrida bo‘ldik. Olmaliqning 123 ming, Bekobodning esa 91 ming aholisi bor. Keyingi bir yil davomida Bekobod bilan Olmaliq o‘rtasida musobaqa uyushtirsak: O‘zbekiston sharoitida ularning qay biri qanday o‘rinni egallaydi?

Biz hozirda bu ikki shaharning har biriga bir xilda yordam ko‘rsatyapmiz. Olmaliqda ham katta korxona bor, u yerda ham uning yangi navbatini ishga tushiryapmiz, Bekobodda ham katta korxona bor, bu yerda ham uning yangi navbati ishga tushirilyapti. Olmaliqda ishlab chiqarish ikki karra oshirilsa, Bekobodda uch karra bo‘ladi.

Har 15 kunda 50 nafar olmaliqlik ikki avtobusda kelib, Bekobodni aylanib, ko‘rsin, bir-biridan o‘rgansin; 15 kundan so‘ng bekobodliklar borib, Olmaliqni o‘rgansin. Shundan so‘ng, buni namuna qilib televizorda ko‘rsatamiz. Musobaqa yakuni bo‘yicha g‘olib chiqqan shaharning to‘rt rahbarini, har birini bittadan shaxsiy avtomobil bilan tabriklasak.

Shavkat Mirziyoyev, O‘zbekiston Prezidenti

Ikkala shaharning rivojlanish tendensiyalarini kuzatib boramiz. Bu ikki metallurgiya kombinati o‘rtasida emas, shaharlar o‘rtasidagi sog‘lom raqobat bo‘ladi. Bozordagi narx-navodan tortib, aholi turmushi uchun yaratilayotgan barcha sharoitlar inobatga olinadi. Yangi korxona ishga tushadimi, yangi ish o‘rni yaratiladimi, barchasini e’tiborga olib boramiz. Bu kabi sog‘lom raqobat ikki shaharning jadal rivojlanishida muhim rol o‘ynaydi.

Shavkat Mirziyoyev, O‘zbekiston Prezidenti