“Bo‘rijar” kanali atrofidagi daraxt shoxlariga ilinib qolgan fuqaro FVV xodimlari tomonidan qutqarib olindi

2017-yilning 22-iyul kuni soat 6:38 da Toshkent shahar Favqulodda vaziyatlar boshqarmasining navbatchi qismiga Ichki ishlar xodimlari tomonidan Chilonzor tumanidagi “Bo‘rijar” kanali atrofida joylashgan daraxt shoxlariga ilinib qolgan fuqaro yordamga muhtoj ekanligi to‘g‘risida xabar kelib tushdi, deya ma’lum qildi Favqulodda vaziyatlar vazirligi matbuot xizmati.

Mazkur murojaatga ko‘ra, Toshkent shahar Favqulodda vaziyatlar boshqarmasining qutqaruv otryadi voqea joyiga tezkorlik bilan yetib kelgan.

Ma’lum bo‘lishicha, “Bo‘rijar” kanalidagi ko‘prikdan 20 metr uzoqlikda, 52 yoshli fuqaro qirg‘oq yonidan piyoda o‘tayotgan vaqtda, ehtiyotsizlik oqibatida suvga tushib ketgan va taxminan 50 metr suzib toliqqanligi bois, daraxt shoxlariga ilinib qolgan.

Qutqaruvchilar maxsus qutqaruv-asbob anjomlari yordamida fuqaroni qirg‘oq bo‘yiga olib chiqishdi. Fuqaro suvda uzoq qolib ketganligi sababli, qutqaruvchilar tomonidan zudlik bilan birinchi tibbiy yordam ko‘rsatildi. Shundan so‘ng, jabrlangan fuqaro tez tibbiy yordam xizmatiga topshirildi. Hozirda qutqarilgan fuqaro shifoxonaga yotqizilgan, uning salomatligiga ziyon yetmagan.