Shavkat Mirziyoyevning 20-iyuldagi farmoyishiga muvofiq, respublika soliq tizimini takomillashtirish bo‘yicha doimiy ishlaydigan ekspert komissiyasi tuzildi, deb yozadi “Gazeta.uz”.
Bir oyda kamida bir marta majlis o‘tkazadigan komissiyaning asosiy vazifalari sifatida soliqqa tortish xalqaro amaliyotini o‘rganish hamda “respublika soliq tizimini dunyoning rivojlangan mamlakatlarida qabul qilingan, xorijiy investorlar uchun tushunarli bo‘lgan va ularni O‘zbekiston iqtisodiyotiga investitsiya kiritishga rag‘batlantiradigan soliq tizimiga muvofiqlashtirish” bo‘yicha takliflarni ishlab chiqish belgilandi.
Komissiya soliq yuklamasining shakllangan darajasining xo‘jalik subyektlari faoliyatining samaradorligi ko‘rsatkichlariga, korxonalarning moliyaviy barqarorligiga, iqtisodiyotdagi o‘zaro hisob-kitoblar holatiga, debitorlik va kreditorlik qarzlari dinamikasiga ta’sirini o‘rganish va tegishli takliflarni tayyorlash bilan shug‘ullanadi.
U, shuningdek, hududlarning soliq salohiyatini o‘rganish, barcha darajalardagi budjetlarning daromad bazasini mustahkamlash, moliya va soliq organlari hamda mahalliy hukumat organlarining soliqqa tortiladigan bazani kengaytirish va soliq to‘planuvchanligini oshirishdan manfaatdorliklarini kuchaytirish bo‘yicha uslubiy masalalarni ishlab chiqadi.
Ekspert komissiyasiga vazirliklar, idoralar, xo‘jalik birlashmalari va tashkilotlar mutaxassislarini, shuningdek, mustaqil ekspertlarni (shu jumladan chet eldan) ishga jalb etish huquqi berildi.
Izoh (0)