20-iyulda o‘tkazilgan ishbilarmonlarning biznes-forumiga 20 dan ortiq xitoylik biznesmenlar tashrif buyurdi.
Prezidentimizning shu yil may oyida Xitoyga davlat tashrifi chog‘ida Xitoy Xalq Respublikasi raisi janob Si Szinpin bilan yuzdan ortiq turli xil sohalarga tegishli bo‘lgan 23 milliard dollarga teng shartnomalar imzolangan edi. Davlat rahbarlari tomonidan belgilangan vazifalarni amalga oshirish uchun turli xil tadbirlar amalga oshirilmoqda.
Shunday tadbirlardan biri Toshkentning “Grand Mir” mehmonxonasida bo‘lib o‘tgan O‘zbekiston—Xitoy ishbilarmonlarining biznes-forumi hisoblanadi. Mazkur forum Tyanszin shahar ishbilarmonlari assotsiatsiyasi va O‘zbekistonda muvaffaqiyatli faoliyat olib borayotgan “Sardoba-salyushn” firmasi tomonidan tashkil etilgan.
Asosiy maqsad Xitoyning Tyanszin shahridan tashrif buyurgan ishbilarmonlarni O‘zbekistonda chet el ishbilarmonlari uchun yaratilgan shart-sharoitlar bilan yaqindan tanishtirish, tegishli sohalardagi O‘zbekiston ishbilarmonlari bilan aloqa bog‘lash va hamkorlik qilishda amaliy yordam ko‘rsatish, ularning qiziqqan sohalari bo‘yicha zarur ma’lumotlarni berish, bir so‘z bilan aytganda O‘zbekistonning iqtisodiy rivojlanishida faol ishtirok etishlariga jalb qilishdan iborat.
O‘tkazilgan biznes-forumda; metallurgiya, biotexnologiya, farmasevtika, oyna ishlab chiqarish, elektr jihozlari, savdo-sotiq, ko‘rgazmalar tashkil etish, yengil sanoat, og‘ir sanoat, qurilish materiallari va oziq-ovqat sanoati, sabzavot va mevalarni qayta ishlash kabi o‘ndan ortiq sohalardagi o‘zbek va xitoy ishbilarmonlarining o‘zaro uchrashuvlari va muzokaralari bo‘lib o‘tdi.
Bugunga qadar mehmonlar Toshkentdagi bir qancha muvaffaqiyatli faoliyat yuritayotgan korxona va tashkilotlarga tashrif buyurib, ularning faoliyati bilan yaqindan tanishdi. Shu bilan birga, Sirdaryoda muvaffaqiyatli faoliyat yuritayotgan “Peng Sheng” O‘zbekiston—Xitoy sanoat zonasiga tashrif buyurdi. Ularga davlatimiz tomonidan berilgan imtiyozlar bilan qiziqishdi.
“Ming marta eshitgandan bir marta ko‘rmoq afzal” degandaridek O‘zbekistonda chet el ishbilarmonlariga yaratilgan barcha sharoitlar bilan yaqindan tanishish natijasida xitoy ishbilarmonlarida O‘zbekiston iqtisodiyotiga nisbatan ulkan qiziqish paydo bo‘ldi. Natijada ko‘plab hamkorlik loyihalari imzolandi. O‘ylaymizki, bu ham go‘zal vatanimiz iqtisodiyotining rivojida o‘z mahsulini yaqin kunlarda namoyon etadi”, — deydi biznes-forum tashkilotchilaridan biri.
Forumda Tyanszin savdo-sotiq palatasi raisi Gen Xui boshchiligida bir qator yirik kompaniya tadbirkorlari va O‘zbekiston Qishloq va suv xo‘jaligi vazirligi, O‘zbekiston o‘simliklari karantini inspeksiyasi hamda O‘zbekiston veterinariya va fito sanitariya qo‘mitasi masalalari bo‘yicha O‘zbekiston hamda Xitoy Xalq Respublikasi munosabatlarini koordinatori vakili Mullabayev Dilshod Tairovich boshchiligida O‘zbekistondagi yirik ishlab chiqaruvchi kompaniyalar ishtirok etdi.
O‘zbekiston va Xitoy Xalq Respublikasi hamkorligidagi Qishloq xo‘jaligi, o‘simliklar karantini hamda veterinariya va fitosanitariya masalalari bo‘yicha koordinator vakili Dilshod Tairovich Mullabayev boshchiligida bir qator ishlab chiqaruvchi korxona va tashkilotlar rahbarlari qatnashdi.
Forumda BIG “Brand Investment Group” korxonasi o‘zining sifatli qishloq xo‘jaligi mahsulotlari asosida bir qator hamkorlar bilan kelishuv shartnomalarni imzoladi.
Eslatib o‘tamiz, shu oyning boshida O‘zbekistonga davlat tashrifi bilan XXRning Karantin inspeksiyasi va sifat nazorati bosh boshqarmasi vaziri Chji Shupin va Qishloq xo‘jaligi vaziri Xan Chanfu kelgan edi. Ularni O‘zbekiston Bosh vaziri o‘rinbosari, Qishloq va suv xo‘jaligi vaziri Mirzayev Zoir Toirovich qabul qildi. Tashrif davomida Bosh vazir o‘rinbosari Mirzayev Zoir Toirovich boshchiligida ilk bor XXRga ho‘l meva eksporti bo‘yicha bayonnoma loyihasi imzolandi.
Reklama huquqi asosida
Izoh (0)