20-iyul, payshanba kuni “O‘zbekiston” teleradiokanali orqali “Biz uchun muhim” ko‘rsatuvining navbatdagi soni to‘g‘ridan-to‘g‘ri efir orqali tomoshabinlarga uzatildi.
Bu safargi mavzu O‘zbekiston Prezidenti Shavkat Mirziyoyevning 17-iyuldagi “Aholini dori vositalari va tibbiyot buyumlari bilan ta’minlash tizimini takomillashtirish bo‘yicha qo‘shimcha chora-tadbirlar to‘g‘risida”gi qaroriga bag‘ishlandi. Unda asosiy muammo sifatida xorijdan kirib keladigan dori vositalarining kamayib ketganligi, mavjudlarining ham narxi juda qimmat ekanligi, shifokorlarning dorixona xodimlari bilan o‘zaro kelishib olgan holda faoliyat yuritayotganliklari haqida so‘z bordi.
Ko‘rsatuvda ekspert sifatida Sog‘liqni saqlash vazirining birinchi o‘rinbosari Bahodir Yusupaliyev, “Dori-darmon” aksiyadorlik kompaniyasi tijorat direktori Abdug‘ani Komilov, Davlat bojxona qo‘mitasi, Markaziy bank va boshqa davlat idora vakillari, xususiy dorixona va OAV vakillari ishtirok etdi.
“Prezident qarorida 343 turdagi dorilarning narxlari va ularning ustiga qo‘yiladigan foizlari belgilab berilgan. Shu dorilarning 116 tasi mahalliy korxonalar tomonidan ishlab chiqariladi. Qolgani esa xorijdan, jumladan, MDH davlatlaridan kirib keladi. To‘g‘ri, 1-yanvardan boshlab kuchga kirgan qaror ba’zi xorijiy dori vositalari taqchilligini yuzaga keltirmoqda, biroq bu vaqtincha. Bu muammolarni hal etish borasida samarali ishlar qilinishi rejalashtirilmoqda”, — dedi Bahodir Yusupaliyev.
“Bizda shifokorlar aynan yozib bergan dorilarning o‘zi bo‘lmasa ham, uning o‘rnini bosuvchi boshqa vositalar mavjud. Shifokorlar bemorlarga retsept yozib berayotganida shuni ham e’tiborga olish lozim”, — deydi Abdug‘ani Komilov.
Ko‘rsatuvda dorixonalarda xorijdan kirib kelayotgan dorilarning aksariyati mavjud emasligi haqida videoroliklar namoyish qilindi. Ijtimoiy tarmoq foydalanuvchilarining ham dori muammosiga bog‘liq savollari o‘qib eshittirildi, jumladan:
“Bizning mahallada dorixona yo‘q. Dorilarni faqatgina dam olish kunlari bozordan sotib olamiz. U yerda dori sotuvchilar o‘zlarining xaltalarida olib kelgan dorilarini ancha qimmat narxlarda pullaydi. Bunga qanday yechim topishimiz kerak?”, — deya savol yo‘lladi Payariq tumanining “Nukus” mahallasida istiqomat qiluvchi fuqaro.
Sog‘liqni saqlash vazirining birinchi o‘rinbosari bu masala yuzasidan tez orada chora ko‘rishga va’da berdi.
Shuningdek, shifokorlarning dorixona xodimlari bilan til biriktirib olishi, ular bemorlarni o‘zlariga tanish bo‘lgan dorixonalarga yuborishi haqida ham savol bo‘lib o‘tdi.
“Afsuski, shunday holatlar ham uchrab turadi. Bunda shifokor dorixonachidan unga mijoz yuborgani uchun qanchadir miqdorda pul oladi albatta. Bu yog‘i endi ularning vijdoniga bog‘liq. Dori sotish — bu biznes emas, u aholining manfaatini, ehtiyojini qondirish uchun xizmat qilishi kerak”, — dedi Bahodir Yusupaliyev.
Izoh (0)