“Toshkent—Samarqand” tezyurar temir yo‘l yo‘nalishi atrofidagi aholi punktlarining me’moriy ko‘rinishi joriy yil oxirigacha yaxshilanadi. Bu O‘zbekiston Vazirlar Mahkamasining 13-iyuldagi qarorida belgilangan, deb yozmoqda “Gazeta.uz”.
Obodonlashtirish ishlari Toshkent shahri, Toshkent, Sirdaryo, Jizzax va Samarqand viloyatlari hududida olib boriladi.
Qarorga asosan, 1-oktabrgacha 3078 ta aholi yashash uyi qayta va kapital ta’mirlanadi. Uylarning tomi almashtiriladi, fasadlari ta’mirlanadi, panjaralar quriladi. Shu maqsadda 33,7 milliard so‘m ajratiladi.
Bundan tashqari, temir yo‘lning atrofida tipik loyiha asosida 629 ta arzon uy quriladi. Ularning umumiy qiymati 79,1 milliard so‘mni tashkil qiladi.
Yangi uylarga 18,9 kilometr gaz, 22 kilometr elektroenergiya, 18,9 kilometr suv ta’minoti tarmog‘i o‘tkaziladi. 21,7 kilometrli avtomobil yo‘li qurish rejalashtirilgan. Bu maqsadda qariyb 30 milliard so‘m ajratiladi.
Avtomobil yo‘llari bo‘yicha davlat qo‘mitasiga 1-oktabrgacha “Toshkent—Samarqand” temir yo‘l uchastkasi yaqinidagi ko‘priklar va yo‘l o‘tkazgichlarini ta’mirlash, shuningdek, buzilgan yo‘l belgilarini almashtirish yuklatilgan.
Izoh (0)