20 июлда ўтказилган ишбилармонларнинг бизнес-форумига 20 дан ортиқ хитойлик бизнесменлар ташриф буюрди.
Президентимизнинг шу йил май ойида Хитойга давлат ташрифи чоғида Хитой Халқ Республикаси раиси жаноб Си Цзиньпин билан юздан ортиқ турли хил соҳаларга тегишли бўлган 23 миллиард долларга тенг шартномалар имзоланган эди. Давлат раҳбарлари томонидан белгиланган вазифаларни амалга ошириш учун турли хил тадбирлар амалга оширилмоқда.
Шундай тадбирлардан бири Тошкентнинг «Grand Mir» меҳмонхонасида бўлиб ўтган Ўзбекистон—Хитой ишбилармонларининг бизнес-форуми ҳисобланади. Мазкур форум Тяньцзинь шаҳар ишбилармонлари ассоциацияси ва Ўзбекистонда муваффақиятли фаолият олиб бораётган «Сардоба-салюшн» фирмаси томонидан ташкил этилган.
Асосий мақсад Хитойнинг Тяньцзинь шаҳридан ташриф буюрган ишбилармонларни Ўзбекистонда чет эл ишбилармонлари учун яратилган шарт-шароитлар билан яқиндан таништириш, тегишли соҳалардаги Ўзбекистон ишбилармонлари билан алоқа боғлаш ва ҳамкорлик қилишда амалий ёрдам кўрсатиш, уларнинг қизиққан соҳалари бўйича зарур маълумотларни бериш, бир сўз билан айтганда Ўзбекистоннинг иқтисодий ривожланишида фаол иштирок этишларига жалб қилишдан иборат.
Ўтказилган бизнес-форумда; металлургия, биотехнология, фармасевтика, ойна ишлаб чиқариш, электр жиҳозлари, савдо-сотиқ, кўргазмалар ташкил этиш, енгил саноат, оғир саноат, қурилиш материаллари ва озиқ-овқат саноати, сабзавот ва меваларни қайта ишлаш каби ўндан ортиқ соҳалардаги ўзбек ва хитой ишбилармонларининг ўзаро учрашувлари ва музокаралари бўлиб ўтди.
Бугунга қадар меҳмонлар Тошкентдаги бир қанча муваффақиятли фаолият юритаётган корхона ва ташкилотларга ташриф буюриб, уларнинг фаолияти билан яқиндан танишди. Шу билан бирга, Сирдарёда муваффақиятли фаолият юритаётган «Пенг Шенг» Ўзбекистон—Хитой саноат зонасига ташриф буюрди. Уларга давлатимиз томонидан берилган имтиёзлар билан қизиқишди.
«Минг марта эшитгандан бир марта кўрмоқ афзал» дегандаридек Ўзбекистонда чет эл ишбилармонларига яратилган барча шароитлар билан яқиндан танишиш натижасида хитой ишбилармонларида Ўзбекистон иқтисодиётига нисбатан улкан қизиқиш пайдо бўлди. Натижада кўплаб ҳамкорлик лойиҳалари имзоланди. Ўйлаймизки, бу ҳам гўзал ватанимиз иқтисодиётининг ривожида ўз маҳсулини яқин кунларда намоён этади», — дейди бизнес-форум ташкилотчиларидан бири.
Форумда Тяньцзинь савдо-сотиқ палатаси раиси Ген Хуи бошчилигида бир қатор йирик компания тадбиркорлари ва Ўзбекистон Қишлоқ ва сув хўжалиги вазирлиги, Ўзбекистон ўсимликлари карантини инспекцияси ҳамда Ўзбекистон ветеринария ва фито санитария қўмитаси масалалари бўйича Ўзбекистон ҳамда Хитой Халқ Республикаси муносабатларини координатори вакили Муллабаев Дилшод Таирович бошчилигида Ўзбекистондаги йирик ишлаб чиқарувчи компаниялар иштирок этди.
Ўзбекистон ва Хитой Халқ Республикаси ҳамкорлигидаги Қишлоқ хўжалиги, ўсимликлар карантини ҳамда ветеринария ва фитосанитария масалалари бўйича координатор вакили Дилшод Таирович Муллабаев бошчилигида бир қатор ишлаб чиқарувчи корхона ва ташкилотлар раҳбарлари қатнашди.
Форумда BIG «Brand Investment Group» корхонаси ўзининг сифатли қишлоқ хўжалиги маҳсулотлари асосида бир қатор ҳамкорлар билан келишув шартномаларни имзолади.
Эслатиб ўтамиз, шу ойнинг бошида Ўзбекистонга давлат ташрифи билан ХХРнинг Карантин инспекцияси ва сифат назорати бош бошқармаси вазири Чжи Шупин ва Қишлоқ хўжалиги вазири Хан Чанфу келган эди. Уларни Ўзбекистон Бош вазири ўринбосари, Қишлоқ ва сув хўжалиги вазири Мирзаев Зоир Тоирович қабул қилди. Ташриф давомида Бош вазир ўринбосари Мирзаев Зоир Тоирович бошчилигида илк бор ХХРга ҳўл мева экспорти бўйича баённома лойиҳаси имзоланди.
Реклама ҳуқуқи асосида
Изоҳ (0)