Facebook’ning messenjerida reklamalar namoyishi boshlanadi. Bu haqda kompaniya o‘zining rasmiy blogida ma’lum qildi, deya xabar bermoqda Meduza.
Reklamalar namoyishining Avstraliya va Tailandda bo‘lib o‘tgan sinovi muvaffaqiyatli chiqqan. Shu bois, kompaniya messenjerdagi reklama namoyishining beta-versiyasini boshqa mamlakatlarda ham ishga tushirishga qaror qilgan.
Reklama mobil dasturning bosh sahifasida namoyish etiladi.
Facebook 2014-yili o‘zining asosiy mobil dasturidan xabar yo‘llash imkoniyatini chiqarib tashlagan edi. Telefon orqali do‘stlar bilan yozishish uchun foydalanuvchilar alohida — Messenger mobil dasturini yuklab olishi lozim.
Kompaniya ma’lumotlariga ko‘ra, Facebook’ning messenjeridan hozirgi vaqtda 1,2 milliard kishi foydalanmoqda. Messenjerda kuniga taxminan ikki milliard xabar almashiladi.
Facebook kompaniyasi Messenger’dan tashqari yana bir messenjer — WhatsApp’ga ham egalik qiladi. Uning foydalanuvchilari soni 1 milliarddan oshgan.
Izoh (0)