Afg‘oniston aviatsiya idoralari mamlakat birinchi vitse-prezidenti Abdul Rashid Dostumning samolyotini Balx viloyatidagi Mozori Sharif aeroportiga qo‘ndirmadi va uni Kobuldagi Hamid Karzay xalqaro aeroportiga jo‘natdi. Bu haqda TOLO News xabar bermoqda.
Ammo samolyot o‘z yo‘nalishini Turmanistonning Ashxobod shahriga o‘zgartirdi. Xabarlarga ko‘ra, Dostum safarlar rejasini o‘zgartirib, endi “mashinada Ashxoboddan mamlakatga bormoqda”. Manbalar ma’lum qilishicha, u Faryob viloyatiga borishi mumkin.
Biroq Afg‘oniston Islom milliy harakati vakili Bashir Ahmad Tayyan bunday xabarlarni rad etdi.
Balx gubernatori Muhammad Atta Nur ham ushbu axborotni rad etdi va Facebook’da samolyot texnik muammolar sababli Turkiyaga qaytib ketishga majbur bo‘lganini yozdi. Nur birinchi vitse-prezident ayni paytda Turkiyada ekanligi va agar u mamlakatga qaytib kelishga qaror qilsa, uning uchun hech qanday yuridik to‘siqlar bo‘lmasligini aytdi.
Bosh prokuratura o‘tgan hafta Dostumga qarshi ish sudga berilganini tasdiqladi. Dostum odamlarni o‘g‘irlab ketishda va o‘z raqibi Ahmad Eshchiga nisbatan jinsiy zo‘ravonlikda ayblandi.
Dostum Afg‘onistonni ikki oy avval tark etib, salomatligi yomonligini bahona qilgan holda Turkiyaga yo‘l olgan edi.
Izoh (0)