Афғонистон авиация идоралари мамлакат биринчи вице-президенти Абдул Рашид Достумнинг самолётини Балх вилоятидаги Мозори Шариф аэропортига қўндирмади ва уни Кобулдаги Ҳамид Карзай халқаро аэропортига жўнатди. Бу ҳақда TOLO News хабар бермоқда.
Аммо самолёт ўз йўналишини Турманистоннинг Ашхобод шаҳрига ўзгартирди. Хабарларга кўра, Достум сафарлар режасини ўзгартириб, энди «машинада Ашхободдан мамлакатга бормоқда». Манбалар маълум қилишича, у Фарёб вилоятига бориши мумкин.
Бироқ Афғонистон Ислом миллий ҳаракати вакили Башир Аҳмад Тайян бундай хабарларни рад этди.
Балх губернатори Муҳаммад Атта Нур ҳам ушбу ахборотни рад этди ва Facebook’да самолёт техник муаммолар сабабли Туркияга қайтиб кетишга мажбур бўлганини ёзди. Нур биринчи вице-президент айни пайтда Туркияда эканлиги ва агар у мамлакатга қайтиб келишга қарор қилса, унинг учун ҳеч қандай юридик тўсиқлар бўлмаслигини айтди.
Бош прокуратура ўтган ҳафта Достумга қарши иш судга берилганини тасдиқлади. Достум одамларни ўғирлаб кетишда ва ўз рақиби Аҳмад Эшчига нисбатан жинсий зўравонликда айбланди.
Достум Афғонистонни икки ой аввал тарк этиб, саломатлиги ёмонлигини баҳона қилган ҳолда Туркияга йўл олган эди.
Изоҳ (0)