Dunyo hamjamiyati Venesuela muxolifati o‘tkazgan xalq referendumi natijalarini tan olishi lozim. Ovoz berish jarayonida xorijiy kuzatuvchilar sifatida ishtirok etgan Kolumbiya, Boliviya va Kosta-Rika sobiq prezidentlari 16-iyul, yakshanba kungi matbuot anjumanida shunga da’vat etdi, deya xabar beradi “TASS”.
“Dunyo davlatlari rahbarlari Venesuela xalqi o‘z irodasini namoyon etganiga befarq bo‘lmasligi kerak. Biz bu referendumni qonuniy deb tan olamiz”, — dedi Kosta-Rika sobiq prezidenti Laura Chinchilya.
Boliviya sobiq prezidenti Xorxe Kiroga Rim papasi Fransisk referendum mavzusida o‘z fikrini “aniq-tiniq aytishi”ga umid bildirdi.
Referendumga prezident Nikolas Maduro tomonidan taklif etilgan Konstitutsiyaviy assambleya chaqirilishiga munosabat, saylovlar o‘tkazilishi hamda yangi milliy birdamlik hukumati shakllantirilishi bilan bog‘liq masalalar qo‘yilgan.
Referendum tashkilotchilari ovoz berish natijalari yaqin soatlarda e’lon etilishini va’da qilmoqda. Hozirgacha ovozlarning 60 foizdan ortig‘i o‘rganib chiqildi.
Izoh (0)