AQShning sobiq prezidenti 92 yoshli Jimmi Karter 13-iyul, payshanba kuni Kanadada organizmning suvsizlanishi sababli kasalxonaga yotqizildi. Bu haqda 39-prezident ishida faol qatnashadigan “Insoniyat manzilgohi” xalqaro xayriya jamg‘armasiga tayanib, Fox News telekompaniyasi ma’lum qildi, deya xabar beradi “TASS”.
AQShni 1977-1981-yillarda boshqargan Karter turmush o‘rtog‘i Rozalin bilan birga Kanadaning Manitoba provinsiyasidagi Vinnipeg shahrida uy qurilishi bo‘yicha xayriya tadbirida qatnashayotganda jazirama tufayli o‘zini noxush his etdi. U ehtiyot chorasi sifatida yaqin oradagi kasalxonaga yetkazildi.
“Prezident Karter bizga o‘zini endi yaxshi his etayotganini ma’lum qildi. U kasalxonaga kuzatuv ostida bo‘lishi uchun yetkazilgandi”, — xabar berdi xayriya tashkiloti vakili.
Sobiq davlat rahbari mazkur tashkilotning maqsadi kam ta’minlangan oilalar uchun uy-joy qurish bo‘lgan loyihalarida umumiy hisobda 34 marotaba ishtirok etgandi.
Izoh (0)