Pxenyan Vashingtonni KXDRga nisbatan kuch ishlatishdan o‘zini tiyishga chaqirdi

Pxenyan Vashingtonni KXDRga nisbatan kuch ishlatishdan o‘zini tiyishga chaqiradi. Bu haqda Koreya markaziy telegraf agentligining “Nodon sinmun” gazetasida e’lon qilingan sharhida ma’lum qilindi, deya xabar beradi “TASS”.

“AQSh taqdiri Vashington KXDRni bataraf etishning harbiy variantini amalda tatbiq etishga kirishganidan fojiaga yuz tutadi. Vashingtonning yadro quroli bilan o‘ynashishi AQShning qit’adagi qismi kultepaga aylanishiga olib kelishi mumkin”, — deyiladi agentlik sharhida. 

Sharh mualliflari Shimoliy Koreya tomonidan 4-iyul kuni Xvason-14 qit’alararo ballistik raketasi uchirilganidan so‘ng AQSh ma’muriyati, jumladan, prezident Donald Tramp bayonotlarida dag‘dag‘a kuchayganiga e’tibor qaratdi. 

Sinovdan so‘ng BMT Xavfsizlik kengashida o‘tkazilgan shoshilinch yig‘ilishda AQShning doimiy vakili Nikki Xeyli ham Pxenyanga harbiy kuch ishlatish bilan tahdid qilgandi.