Buxoro viloyati bojxona boshqarmasi binosida Buxoro shahar ma’muriy sudi tomonidan sayyor sud majlisi tashkil etildi. Unda viloyat bojxonachilari tomonidan aniqlangan 24 ta bojxona qoidabuzarliklari mazkur sud tomonidan ko‘rib chiqildi va jazoning muqarrarligi ta’minlandi, deb xabar berdi Buxoro viloyati bojxona boshqarmasi axborot xizmati.
Amaldagi tartiblarga muvofiq, O‘zbekiston Respublikasi va insoniyat xavfsizligiga qarshi, hududiy yaxlitlikni, davlat suvereniteti va siyosiy mustaqillikni buzishga qaratilgan bosma nashriyot mahsulotlari, qo‘lyozmalar, rasmlar, fotosuratlar, fotoplyonkalar, negativlar, kino, video va audio mahsulotlari, ovoz yozilgan materiallar, shuningdek, urush, terrorizm, zo‘ravonlik, milliy ajratish va diniy qarshilik hamda pornografik mazmundagi materiallarni olib kirish taqiqlangan.
Bojxona chegaralari orqali jismoniy shaxslar tomonidan noutbuk, qo‘l telefoni va boshqa axborot tashuvchi vositalarda behayolik va zo‘ravonlikni targ‘ib etuvchi materiallarni olib o‘tishga bo‘lgan urinishlar tez-tez uchramoqda.
Masalan, Buxoro xalqaro aeroportida “Moskva — Buxoro” yo‘nalishidagi reys bilan uchib kelgan J.Rajabov uyali telefoni xotirasida behayo mazmundagi 227 dona foto hamda 596 dona video materiallarni olib kirayotgan paytda to‘xtatib qolindi.
Aksariyat hollarda ushbu huquqbuzarliklarni sodir etgan shaxslar amaldagi tartiblarni bilmasliklarini, hattoki qo‘l telefonlari va noutbuklarda aniqlangan taqiqlangan materiallarning qanday qilib paydo bo‘lib qolganini bilmasliklarini pesh qilishadi. Bu esa ularni javobgarlikdan ozod qilmaydi.
Buxoro viloyati bojxona boshqarmasi xodimlari tomonidan 2017-yilning o‘tgan davri mobaynida 240 ta holatda 8 ming donadan ortiq pornografik mazmundagi foto, video va audio materiallarning olib kirilishi oldi olindi.
Tahlillarga ko‘ra, Buxoro shahri, G‘ijduvon, Peshku, Jondor, Vobkent va Kogon tumanlarida yashovchi fuqarolar tomonidan mazkur yo‘nalishdagi bojxona qoidabuzarliklari nisbatan ko‘p sodir etilgan. Ko‘rinib turibdiki, ushbu hududlarda profilaktik tadbirlar soni va sifatini oshirishni davrning o‘zi taqozo etmoqda.
Izoh (0)