Бухоро вилояти божхона бошқармаси биносида Бухоро шаҳар маъмурий суди томонидан сайёр суд мажлиси ташкил этилди. Унда вилоят божхоначилари томонидан аниқланган 24 та божхона қоидабузарликлари мазкур суд томонидан кўриб чиқилди ва жазонинг муқаррарлиги таъминланди, деб хабар берди Бухоро вилояти божхона бошқармаси ахборот хизмати.
Амалдаги тартибларга мувофиқ, Ўзбекистон Республикаси ва инсоният хавфсизлигига қарши, ҳудудий яхлитликни, давлат суверенитети ва сиёсий мустақилликни бузишга қаратилган босма нашриёт маҳсулотлари, қўлёзмалар, расмлар, фотосуратлар, фотоплёнкалар, негативлар, кино, видео ва аудио маҳсулотлари, овоз ёзилган материаллар, шунингдек, уруш, терроризм, зўравонлик, миллий ажратиш ва диний қаршилик ҳамда порнографик мазмундаги материалларни олиб кириш тақиқланган.
Божхона чегаралари орқали жисмоний шахслар томонидан ноутбук, қўл телефони ва бошқа ахборот ташувчи воситаларда беҳаёлик ва зўравонликни тарғиб этувчи материалларни олиб ўтишга бўлган уринишлар тез-тез учрамоқда.
Масалан, Бухоро халқаро аэропортида «Москва — Бухоро» йўналишидаги рейс билан учиб келган Ж.Ражабов уяли телефони хотирасида беҳаё мазмундаги 227 дона фото ҳамда 596 дона видео материалларни олиб кираётган пайтда тўхтатиб қолинди.
Аксарият ҳолларда ушбу ҳуқуқбузарликларни содир этган шахслар амалдаги тартибларни билмасликларини, ҳаттоки қўл телефонлари ва ноутбукларда аниқланган тақиқланган материалларнинг қандай қилиб пайдо бўлиб қолганини билмасликларини пеш қилишади. Бу эса уларни жавобгарликдан озод қилмайди.
Бухоро вилояти божхона бошқармаси ходимлари томонидан 2017 йилнинг ўтган даври мобайнида 240 та ҳолатда 8 минг донадан ортиқ порнографик мазмундаги фото, видео ва аудио материалларнинг олиб кирилиши олди олинди.
Таҳлилларга кўра, Бухоро шаҳри, Ғиждувон, Пешку, Жондор, Вобкент ва Когон туманларида яшовчи фуқаролар томонидан мазкур йўналишдаги божхона қоидабузарликлари нисбатан кўп содир этилган. Кўриниб турибдики, ушбу ҳудудларда профилактик тадбирлар сони ва сифатини оширишни даврнинг ўзи тақозо этмоқда.
Изоҳ (0)