Fransiyaning PSA Peugeot Citroen kompaniyasining “O‘zavtosanoat” AK bilan birgalikda tashkil etgan Uzbekistan Peugeot Citroen Automotive qo‘shma korxonasi 6-iyul, payshanba kuni Jizzax viloyatida mikroavtobuslarni ishlab chiqarish bo‘yicha zavodning qurilishini boshladi, deb xabar berdi “1news.uz”.
“Bugun PSA Peugeot Citroen fransuz avtomobil zavodining qurilishi boshlanishi munosabati bilan qurilish maydoniga ramziy kapsulani joylashtirish marosimi bo‘lib o‘tdi”, — dedi “O‘zavtosanoat” vakili “RIA Novosti”ga.
Korxona “Jizzax” erkin iqtisodiy zonasi hududida joylashtiriladi. Marosimda O‘zbekiston bosh vaziri o‘rinbosari, “O‘zavtosanoat” AK raisi Ulug‘bek Ro‘ziqulov va PSA Peugeot Citroen guruhi vitse-prezidenti Kristof Berjeran ishtirok etdi.
May oyining o‘rtasida PSA va “O‘zavtosanoat” AK o‘rtasida yaratilayotgan UzPCA MChJning nizom kapitali 29,3 million yevroni tashkil etishi borasidagi bitimni imzolagandi. Kelishuvga binoan qo‘shma korxona Jizzax viloatida 133,3 millon yevro qiymatidagi yengil tijorat avtomobillarini ishlab chiqarish zavodini quradi. Peugeot va Citroen brendi ostidagi avtomobillarni yiliga 16 ming dona ishlab chiqarish quvvatiga ega zavod 2019-yilda ishga tushirilishi rejalashtirilmoqda.
O‘zbekiston Respublikasi Prezidenti Shavkat Mirziyoyev o‘zining qarori bilan qo‘shma korxonalarga 2030-yilga qadar bir qator soliq va bojxona imtiyozlarini yaratib berdi.
“O‘zavtosanoat” AK 2004-yilda “O‘zavtosanoat” assotsatsiyasi bazasida tashkil etilgan bo‘lib, O‘zbekiston avtomobil sanoati korxonalarini o‘zida birlashtiradi. Kompaniya tarkibiga 30 ga yaqin korxona kiradi. Ularning eng yirigi yengil avtomobillar ishlab chiqaruvchi GM Uzbekistan QK (Asaka, Andijon viloyati), avtobus va Isuzu yuk mashinalari uchun shassi ishlab chiqaruvchi “SamAvto” MChJ va MAN yuk avtomobillarini (furgon, samosval, tirkama) ishlab chiqaruvchi MAN Auto Uzbekistan (Samarqand viloyati).
2016-yil yakunlariga ko‘ra O‘zbekistonda avtomobil ishlab chiqarish 2015-yilga nisbatan 2,1 barobarga kamayib, 92 625 tani tashkil etgan.
Izoh (0)