Kanadada 25 yoshli Cheyz Kempbell kechasi yopiq portda avtomobil bilan parom ustiga sakradi. Hozirda unga nisbatan 13 ta band bilan ayblov e’lon qilingan, deb xabar berdi “Motor”.
Kempbell Kanada g‘arbida joylashgan Britaniya Kolumbiyasi provinsiyasidagi Sanshayn Kost portiga kechasi ikki yarimlarda kelgan. U hududga darvozani buzib kirgan. Shundan so‘ng Chevrolet Blazer avtomobilini boshqargan jinoyatchi yana bir nechta to‘siqlardan o‘tib yuk ortish rampasiga yo‘l olgan.
Kempbell paromga ulanmagan, ko‘tarib qo‘yilgan rampa orqali kema palubasiga sakrashni amalga oshirgan va mashinalarni ortish uchun mo‘ljallangan joyga “qo‘ngan”. Suratdan ko‘rish mumkinki, avtomobil palubaning chetiga old qismi bilan qulagan.
Jinoyatchiga hech qanday zarar yetmagan va u portga qaytgan. U yerda Kempbell avtoturargohdagi ikkita mashinani minib qochishga harakat qilgan, biroq unga qadar politsiya yetib kelgan. Kempbell avtomobilni xavfli boshqarish, tajovuz qilish, politsiyachiga hujum qilish va katta miqdorda moddiy zarar yetkazish kabi ayblovlar bilan ayblanmoqda.
Izoh (0)