Yurisprudensiya bo‘yicha qo‘shimcha-kontraktda o‘qiganlar 25 baravar miqdorda kontrakt to‘laydi

Barcha yo‘nalishlar bo‘yicha qo‘shimcha kontraktning aniq miqdorlari belgilandi. “Xushnudbek.uz” sayti bu haqdagi ma’lumotlarni tahlil qilib chiqib, eng qimmat yo‘nalish yurisprudensiya ekanligini aniqladi.

20-iyun kuni Vazirlar Mahkamasining “Oliy ta’lim muassasalariga qabul qilish, talabalar o‘qishini ko‘chirish, qayta tiklash va o‘qishdan chetlashtirish tartibi to‘g‘risidagi nizomlarni tasdiqlash haqida”gi 393-sonli qarori qabul qilingan va unda qo‘shimcha kontraktlarning oshirilgan miqdori tasdiqlangan edi.

O‘zbekiston ta’lim muassasalariga o‘qishga qabul qilish bo‘yicha Davlat komissiyasi mazkur qarorning ijrosini ta’minlash maqsadida to‘lov-kontrakt asosida belgilangan kvotadan tashqari oliy ta’lim muassasalariga qo‘shimcha ravishda qabul qilish bo‘yicha tartib ishlab chiqdi.

Vazirlar Mahkamasi qaroriga ko‘ra, to‘plagan ballari tasdiqlangan to‘lov-kontrakt bo‘yicha qabul kvotalari chegarasiga 4 ballgacha yetmagan abituriyentlar uchun quyidagicha miqdor belgilangan edi:

1 ballgacha yetmagan abituriyentlar uchun – 1,5 barobar;

1.1 balldan 2 ballgacha yetmaganlar uchun – 2,0 barobar;

2.1 balldan 3 ballgacha yetmaganlar uchun – 2,5 barobar;

3.1 balldan 4 ballgacha yetmaganlar uchun – 3,0 barobar.

Davlat komissiyasining tartibiga muvofiq, barcha ta’lim sohasi va ta’lim yo‘nalishlari bo‘yicha 4 balldan ortiq ball yetmagan, eng yuqori ballning 30 foizdan (68 ball) kam bo‘lmagan holda, qo‘shimcha ravishda o‘qish istagini bildirgan abituriyentlarning birinchi o‘quv yili uchun to‘lov-kontrakt miqdorlari tasdiqlandi.

“Oshirilgan to‘lov-kontrakt miqdorlariga nazar tashlasak, eng qimmat to‘lov huquq yo‘nalishida ekanligini ko‘rish mumkin. Unga ko‘ra, yurisprudensiya yo‘nalishi bo‘yicha qo‘shimcha-kontraktda o‘qish istagini bildirganlar birinchi o‘quv yili uchun 25 baravar miqdorda kontrakt to‘lashi lozim bo‘ladi. Bu bugungi kunda 246 million 250 ming so‘mni tashkil etmoqda”, — deyiladi materialda.

Ushbu oshirilgan kontrakt miqdori faqat birinchi yil uchun to‘lanadi. Keyingi yillarda hamma qatori oddiy miqdordagi kontrakt to‘lanadi.

Materialda barcha yo‘nalishlar bo‘yicha to‘lov miqdorlari bilan tanishish mumkin.