1 июлдан бошлаб Бухоро – Самарқанд – Тошкент йўналиши бўйлаб юқори тезликда ҳаракатланувчи «Афросиёб» йўловчи электропоезди қатнови йўлга қўйилади. Бу ҳақда «Ўзбекистон темир йўллари» АЖ ахборот хизматига таяниб, UZ24 маълум қилди.
№766/765-сонли поезд ҳар куни эрталабки соат 5:00 да Бухоро вокзалидан жўнаб, эрталабки соат 8:48 да Тошкент марказий вокзалига кириб келади. Шу куни кечки соат 18:50 да ортга қайтган поезд тунги соат 22:48 да Бухорога етиб боради.
Шу муносабат билан 1 июлдан Тошкент – Қарши – Тошкент ҳамда Тошкент – Бухоро – Тошкент йўналишларида ҳаракатланаётган «Афросиёб» поездларининг ҳаракатланиш вақтига ҳам ўзгартириш киритилди.
Тошкент – Қарши – Тошкент йўналишида ҳаракатланадиган №760/759-сонли «Афросиёб» ҳар куни эрталабки соат 8:00 да Тошкент марказий вокзалидан жўнаб, кундузги соат 11:20 да Қаршига етиб боради ва шу куннинг ўзида кундузги соат 16:48 да Қарши вокзалидан ортга қайтиб, кечки соат 20:10 да Тошкентга етиб келади.
Тошкент – Бухоро – Тошкент йўналишида ҳаракатланадиган №762/761-сонли электропоезд ҳар куни эрталабки соат 7:30 да пойтахтдан жўнаб, кундузги соат 11:16 да Бухорога етиб боради ва шу куни кундузги соат 15:52 да Бухородан ортга қайтиб, кечки соат 19:40 да Тошкентга етиб келади.
Шунингдек, 1 июль кунидан бошлаб бир қатор йўловчи поездларнинг ҳаракатланиш жадвалига ҳам ўзгартиришлар киритилди. Бу борадаги маълумотларни «www.railway.uz» веб-сайти ёки 1005 телефон рақами орқали билиб олишингиз мумкин, дейилади «Ўзбекистон темир йўллари» хабарида.
Изоҳ (0)