IShID terrorchilik tashkiloti Iroqning Mosul shahri ustidan nazoratni to‘liq boy berdi. Bu haqda, Iroq Mudofaa vazirligi vakiliga asoslanib, “TASS” xabar bermoqda.
IShID Mosul shahrini bundan uch yil avval egallab olgan edi. Iroq Mudofaa vazirligi vakilining ma’lum qilishicha, Mosulda IShID nazorat qilayotgan birorta ham hudud qolmagan.
Uning qayd etishicha, IShID jangarilarida taslim bo‘lishdan o‘zga chora yo‘q. “Kuchlarimiz Mosulning Eski shahariga kirib bormoqda. Oz qoldi, biz Mosul ustidan to‘liq nazorat o‘rnatish arafasidamiz”, — dedi vazirlik vakili.
O‘tgan hafta hukumat kuchlari IShID yetakchisi Abu Bakr al-Bag‘dodiy bundan uch yil avval “xalifalik”ni e’lon qilgan An-Nuriy jome’ masjidi atrofidagi hudud ustidan nazorat o‘rnatgan edi.
XII asrga oid me’moriy yodgorlik Iroq xavfsizlik kuchlari yurishi vaqtida jangarilar tomonidan portlatib yuborildi. Masjid bilan birga mashhur “og‘ma minora” ham yo‘q qilingan edi.
Kattaligi bo‘yicha Iroqning ikkinchi shahri hisoblangan Mosulni IShID jangarilaridan ozod qilish bo‘yicha maxsus operatsiya 2016-yil oktabrida boshlangan edi. Operatsiya AQSh boshliq xalqaro koalitsiya kuchlari harbiy aviatsiyasi ko‘magida amalga oshirilmoqda.
Izoh (0)