Futbol bo‘yicha O‘zbekiston milliy terma jamoasi sardori Odil Ahmedov Namanganda futbol akademiyasini ishga tushirish arafasida turibdi. Bu borada futbolchi “Championat.asia” nashriga intervyu berdi.
Ma’lum bo‘lishicha, Odil Ahmedov Eronga qarshi bellashuvdan so‘ng Toshkentda burnini operatsiya qildirgan. Shu boisdan u “Shanxay SIPG”ning Oskar jandal keltirib chiqargan va durang bilan yakunlangan o‘yinida ishtirok eta olmagan.
Odil Junior akademiyasi haqida
Namangan farzandi sifatida vodiylik iste’dodlarga imkon berishni vazifam deb bildim. Loyihani birinchi bo‘lib Namanganda boshlaymiz. Keyin qiziqish bo‘lsa, vodiyning boshqa viloyatlarida ham amalga oshiramiz. Mahalliy bolalarni uzoqlarda sarson bo‘lishdan saqlashni va ularga poytaxtdagi muhitni yaratib berishni niyat qilganmiz. Uni qo‘llab-quvvatlayotgani uchun viloyat hokimi Xayrullo Hayitboyevichga rahmat aytish burchim.Odil Ahmedov, O‘zbekiston MTJ sardori
Futbolchilarni kim saralaydi?
Loyihani amalga oshirishdan maqsad daromad ko‘rish emas. U yerda eng zo‘rlar jamlanishi kerak. Bolalar futbolida o‘z o‘rniga ega mutaxassislardan Dilshod Nuraliyev, termada faoliyat olib borayotgan serbiyalik mutaxassis Deyan Jurjevich qatorida, vodiyning o‘zidan mutaxassislar jalb etamiz, tanish-bilishchilikka o‘rin qoldirmaymiz. Hujumchilarga baho berishda Anvar Soliyevning mahorati ham asqotadi.Rossiyada “Krasnodar” klubida o‘ynadim. Uning akademiyasi Yevropadagi eng yaxshilardan biri. Klub bilan albatta hamkorlikni yo‘lga qo‘yamiz. Odil Junior filiallari orqali futbolchilarni 13 yoshgacha toblab, keyin eng yaxshilarini vodiydagi kollejlarga joylaymiz va nazorat qilamiz. Bunda sport inventarlari ham zamonaviy bo‘lishi kerak. Muhimi, respublika bo‘ylab o‘tkaziladigan musobaqalarda doimiy ishtirok etishni ta’minlashimiz lozim. Bunda o‘z hissamni qo‘shaman. Vodiy ligasini tuzish orqali katta marralarni zabt etamiz.
Biz yangi ish boshlayapmiz. Ota-onalar o‘z farzandlarini bizga ishonib topshirsa, 4—5 yil ichida bu natija berishni boshlaydi. O‘zbekiston o‘smirlar terma jamoasidan boshlab, nasib qilsa, milliy terma jamoagacha yo‘lni bosib o‘tamiz.
Odil Ahmedov, O‘zbekiston MTJ sardori
Vodiy klublari
Avvallari vodiy jamoalarida mahalliy futbolchilar o‘ynardi. Ular biz uchun haqiqiy yulduz sanalgan. Hozir bundaylar juda kamayib ketdi. Pul bilan muammo bo‘lsa, ular jamoani tark etadi. Bu futbolning yozilmagan qonuni. Biz vodiylik futbolchilarni toblash orqali, ularda o‘z viloyatiga bo‘lgan hurmatni uyg‘otamiz va qiyin pallada ham o‘z jamoasiga sodiq qolishni o‘rgatamiz. “Ketsang, chetga ket” shiori ostida faoliyat olib boramiz.Yaqinda To‘raqo‘rg‘ondagi Odil Junior maktabiga JFL Tashkent bilan hamkorlikda ispaniyalik mutaxassis Kiko Zuniga tashrif buyurdi. U o‘zbekistonlik futbolchilarning mahoratini ko‘rib, lol bo‘lganini aytdi. Bu bizga yana bir motivatsiya bo‘ladi.
Bizda yaxshi bolalar hamisha bo‘lgan. Ularni avaylab o‘stirishimiz kerak. Har bir tumanda o‘z filialimizga ega bo‘lganimizdan so‘ng, men vodiy ligasi dasturi ustida ishlayman. Eng katta loyihamiz mana shu bo‘ladi. Unga qadar hokimiyat tomonidan ajratilayotgan hududda Odil Junior uchun maxsus arena qurish niyatidaman.
Odil Ahmedov, O‘zbekiston MTJ sardori
Izoh (0)