Футбол бўйича Ўзбекистон миллий терма жамоаси сардори Одил Аҳмедов Наманганда футбол академиясини ишга тушириш арафасида турибди. Бу борада футболчи «Championat.asia» нашрига интервью берди.
Маълум бўлишича, Одил Аҳмедов Эронга қарши беллашувдан сўнг Тошкентда бурнини операция қилдирган. Шу боисдан у «Шанхай СИПГ»нинг Оскар жандал келтириб чиқарган ва дуранг билан якунланган ўйинида иштирок эта олмаган.
Odil Junior академияси ҳақида
Наманган фарзанди сифатида водийлик истеъдодларга имкон беришни вазифам деб билдим. Лойиҳани биринчи бўлиб Наманганда бошлаймиз. Кейин қизиқиш бўлса, водийнинг бошқа вилоятларида ҳам амалга оширамиз. Маҳаллий болаларни узоқларда сарсон бўлишдан сақлашни ва уларга пойтахтдаги муҳитни яратиб беришни ният қилганмиз. Уни қўллаб-қувватлаётгани учун вилоят ҳокими Хайрулло Ҳайитбоевичга раҳмат айтиш бурчим.Одил Аҳмедов, Ўзбекистон МТЖ сардори
Футболчиларни ким саралайди?
Лойиҳани амалга оширишдан мақсад даромад кўриш эмас. У ерда энг зўрлар жамланиши керак. Болалар футболида ўз ўрнига эга мутахассислардан Дилшод Нуралиев, термада фаолият олиб бораётган сербиялик мутахассис Деян Журжевич қаторида, водийнинг ўзидан мутахассислар жалб этамиз, таниш-билишчиликка ўрин қолдирмаймиз. Ҳужумчиларга баҳо беришда Анвар Солиевнинг маҳорати ҳам асқотади.Россияда «Краснодар» клубида ўйнадим. Унинг академияси Европадаги энг яхшилардан бири. Клуб билан албатта ҳамкорликни йўлга қўямиз. Odil Junior филиаллари орқали футболчиларни 13 ёшгача тоблаб, кейин энг яхшиларини водийдаги коллежларга жойлаймиз ва назорат қиламиз. Бунда спорт инвентарлари ҳам замонавий бўлиши керак. Муҳими, республика бўйлаб ўтказиладиган мусобақаларда доимий иштирок этишни таъминлашимиз лозим. Бунда ўз ҳиссамни қўшаман. Водий лигасини тузиш орқали катта марраларни забт этамиз.
Биз янги иш бошлаяпмиз. Ота-оналар ўз фарзандларини бизга ишониб топширса, 4—5 йил ичида бу натижа беришни бошлайди. Ўзбекистон ўсмирлар терма жамоасидан бошлаб, насиб қилса, миллий терма жамоагача йўлни босиб ўтамиз.
Одил Аҳмедов, Ўзбекистон МТЖ сардори
Водий клублари
Авваллари водий жамоаларида маҳаллий футболчилар ўйнарди. Улар биз учун ҳақиқий юлдуз саналган. Ҳозир бундайлар жуда камайиб кетди. Пул билан муаммо бўлса, улар жамоани тарк этади. Бу футболнинг ёзилмаган қонуни. Биз водийлик футболчиларни тоблаш орқали, уларда ўз вилоятига бўлган ҳурматни уйғотамиз ва қийин паллада ҳам ўз жамоасига содиқ қолишни ўргатамиз. «Кетсанг, четга кет» шиори остида фаолият олиб борамиз.Яқинда Тўрақўрғондаги Odil Junior мактабига JFL Tashkent билан ҳамкорликда испаниялик мутахассис Кико Зунига ташриф буюрди. У ўзбекистонлик футболчиларнинг маҳоратини кўриб, лол бўлганини айтди. Бу бизга яна бир мотивация бўлади.
Бизда яхши болалар ҳамиша бўлган. Уларни авайлаб ўстиришимиз керак. Ҳар бир туманда ўз филиалимизга эга бўлганимиздан сўнг, мен водий лигаси дастури устида ишлайман. Энг катта лойиҳамиз мана шу бўлади. Унга қадар ҳокимият томонидан ажратилаётган ҳудудда Odil Junior учун махсус арена қуриш ниятидаман.
Одил Аҳмедов, Ўзбекистон МТЖ сардори
Изоҳ (0)