Kvartirani ta’mirlatishda aldanib qolmaslik uchun besh maslahat

Kvartiraning ta’miri juda muhim va mas’uliyatli jarayon bo’lib, unda uy egasining shaxsiy nazorati katta ahamiyatga ega. Har qanday holatda ham ta’mirlovchilar turli kamchiliklarga yo‘l qo‘yishi va uy egasini aldashi mumkin. “Tak prosto” nashri buning oldini olish uchun o‘z maslahatlarini taklif qildi.

Materiallarni sotib olish

Hech qanday holatda qurilish materillarini xarid qilishni ishchilarga ishonmang, hatto ular buni iltimos qilsa ham. Ular tez-tez narx ustiga o‘z manfaatini ham qo‘shadi. Qurilish materiallari bozoridagi narxlarni o‘rganing va tekshirilgan do‘konlarda xaridni amalga oshiring.

Ish qurollarini sotib olish

Agar ishchilar sizning hisobingizdan ish qurollari sotib olish kerakligini aytsa, ularning xizmatidan foydalanmagan ma’qul. Tajribali ustalarda, albatta, har qanday uyni ta’mirlash uchun kerak bo‘lgan barcha zarur qurollar bo‘ladi.

Kvartira ishchilarning yashash joyiga aylanmasligi kerak

Ba’zi ishchilar o‘zlari ta’mirlayotgan uyda yashashni so‘raydi. Bu holatda ishchilar nafaqat sizning, balki qo‘shningizning uyini ham ta’mirlashi mumkin. Bundan tashqari, ishchilarning tunashga joyi bo‘lmagan tanishlari ham sizning kvartirangizda mehmon bo‘lishi mumkin.

Ta’mir muddatlari

Agar ishchilar ta’mirni bir necha kun ichida to‘liq tugatishni va’da bersa, ishning sifati ham shunga yarasha bo‘ladi. Ishchilar muddatni cho‘zishi ham mumkin. Bunday xatti-harakat siz ishchilarning yagona mijozi emasligingizdan dalolat beradi.

Ishchilarning beparvoligi

Ta’mir jarayonini har doim nazorat qilish kerak, ayniqsa ish yopiq kommunikatsiyalar ustida borayotganda. Aks holda siz devorga yopishtirilgan rozetkalar va arzon plastmassa quvurlarga ega bo‘lishingiz mumkin.