14-iyun kuni Xalqaro press-klubda yangi tashkil etilayotgan “O‘zbekiston 24” teleradiokanali faoliyatiga bag‘ishlangan anjuman bo‘lib o‘tdi. Unda teleradiokanal direktori Ozod Hamidxo‘jayev shu vaqtgacha mamlakatda “kunu-tun yangiliklar uzatadigan bunday telekanal” bo‘lmaganini ta’kidladi. “Daryo” telekanal rahbarining so‘zlarini tekshirib ko‘rdi.
Iqtibos
“O‘zbekiston 24”ning ochilishi O‘zbekiston televideniyesi tarixidagi tarixiy voqeadir. Shu vaqtgacha kunu-tun yangiliklar uzatadigan bunday telekanal yo‘q edi.Faktchek
Ozod Hamidxo‘jayev tilga olgan O‘zbekiston televideniyesi davlat va nodavlat telekanallarni qamrab oluvchi katta tushuncha bo‘lib, unda “shu vaqtgacha kunu-tun yangiliklar uzatadigan telekanal bo‘lmagani” haqidagi bayonot — unchalik to‘g‘ri emas.“O‘zbekiston 24”ning efir jadvali har soatda efirga chiqadigan yangiliklar, studiyadagi suhbatlar, joriy voqea va hodisalar tahliliga bag‘ishlangan mavzuli ko‘rsatuvlardan iborat bo‘ladi. 2014-yil aprelida faoliyatini boshlagan UzReport TV’ning mundarijasi ham qariyb shunday — unda ham har soatda yangiliklar beriladi, ekspertlar bilan muloqotlar ko‘rsatiladi, tahliliy ko‘rsatuvlar, sharhlar efirga uzatiladi.
Yagona farqi — UzReport’da futbol translyatsiyalari va ba’zi ko‘ngilochar ko‘rsatuvlar bor (va’da berishlaricha, “O‘zbekiston 24”da ko‘ngilochar dasturlar bo‘lmaydi); qayd etish joiz, UzReport’dagi futbol mavzusi yangi ochilgan “Futbol TV”ga o‘tmoqda. Shunga qaramay, UzReport jamoatchilik orasida “kunu-tun ishlaydigan yangiliklar telekanali” sifatida tanilib bo‘lgan.
Izoh (0)