14 июнь куни Халқаро пресс-клубда янги ташкил этилаётган «Ўзбекистон 24» телерадиоканали фаолиятига бағишланган анжуман бўлиб ўтди. Унда телерадиоканал директори Озод Ҳамидхўжаев шу вақтгача мамлакатда «куну-тун янгиликлар узатадиган бундай телеканал» бўлмаганини таъкидлади. «Дарё» телеканал раҳбарининг сўзларини текшириб кўрди.
Иқтибос
«Ўзбекистон 24»нинг очилиши Ўзбекистон телевидениеси тарихидаги тарихий воқеадир. Шу вақтгача куну-тун янгиликлар узатадиган бундай телеканал йўқ эди.Фактчек
Озод Ҳамидхўжаев тилга олган Ўзбекистон телевидениеси давлат ва нодавлат телеканалларни қамраб олувчи катта тушунча бўлиб, унда «шу вақтгача куну-тун янгиликлар узатадиган телеканал бўлмагани» ҳақидаги баёнот — унчалик тўғри эмас.«Ўзбекистон 24»нинг эфир жадвали ҳар соатда эфирга чиқадиган янгиликлар, студиядаги суҳбатлар, жорий воқеа ва ҳодисалар таҳлилига бағишланган мавзули кўрсатувлардан иборат бўлади. 2014 йил апрелида фаолиятини бошлаган UzReport TV’нинг мундарижаси ҳам қарийб шундай — унда ҳам ҳар соатда янгиликлар берилади, экспертлар билан мулоқотлар кўрсатилади, таҳлилий кўрсатувлар, шарҳлар эфирга узатилади.
Ягона фарқи — UzReport’да футбол трансляциялари ва баъзи кўнгилочар кўрсатувлар бор (ваъда беришларича, «Ўзбекистон 24»да кўнгилочар дастурлар бўлмайди); қайд этиш жоиз, UzReport’даги футбол мавзуси янги очилган «Футбол ТВ»га ўтмоқда. Шунга қарамай, UzReport жамоатчилик орасида «куну-тун ишлайдиган янгиликлар телеканали» сифатида танилиб бўлган.
Изоҳ (0)