14-iyun kuni Xalqaro press-klubning navbatdagi anjumani bo‘lib o‘tdi. Unda O‘zbekiston Respublikasi Prezidenti tomonidan 2017-yilning 2-mayda qabul qilingan “O‘zbekiston 24” axborot tahliliy teleradiokanali faoliyatini tashkil etish to‘g‘risida”gi Qarorining ijrosi doirasida amalga oshirilayotgan ishlar muhokama qilindi.
Tadbirda spikerlarga ko‘plab savollar berildi, jumladan, barchani qiziqtirayotgan “Axborot” hamda “Tahlilnoma” ko‘rsatuvlarining keyingi taqdiri nima bo‘ladi? Avvalroq, “O‘zbekiston 24” telekanali efirga chiqishni boshlashi bilan “O‘zbekiston” telekanalidagi “Axborot”, “Yoshlar” telekanalidagi “Davr” va Toshkent telekanalidagi “Poytaxt” informatsion dasturlari o‘z faoliyatini to‘xtatadi deya xabar berilgandi.
Bu savolga O‘zbekiston milliy teleradiokompaniyasi raisining birinchi o‘rinbosari Bobur Alixonov javob berdi: “Biz bu brendni saqlab qolamiz deb o‘ylayman. “Axborot” — bu shunchaki ko‘rsatuv emas, aksariyat aholimiz bu ko‘rsatuvga o‘rganib qolgan va uni o‘nlab yillar davomida ma’lum bir vaqtda kutadi. Bu ko‘rsatuvni ko‘rish o‘ziga xos an’ana, hayot tarziga aylanib ulgurgan. Aynan shu tufayli biz “O‘zbekiston” telekanali dasturlarida ushbu ko‘rsatuv bo‘lishi kerak degan fikrga keldik”.
“Axborot” brendi ba’zi o‘zgartirishlar bilan saqlanib qolinadi. Ko‘rsatuv nomi ham “Axborot 24”ga o‘zgarib, kechgi vaqtda efirga chiqadi va kunning yakuniy yangiliklarini yoritib boradi. “Axborot 24” bir vaqtning o‘zida “O‘zbekiston 24” hamda “O‘zbekiston” telekanallarida efirga uzatiladi. “Tahlilnoma” ko‘rsatuvi ustida esa ishlar davom etmoqda. Bu kabi tahliliy ko‘rsatuv “O‘zbekiston 24” kanalining dasturlari orasida albatta bo‘ladi, deya qo‘shimcha qildi Alixonov.
Izoh (0)