O‘zbekistonda suv ta’minoti gaz va energiya ta’minotidan so‘ng yagona billing tizimiga o‘tmoqda. Bu haqda 12-iyun kuni Toshkent shahrida bo‘lib o‘tgan press-konferensiyada ma’lum qilindi, deb xabar berdi Norma.
Uy-joy va kommunal xizmatlar sohasini rivojlantirish eng muhim vazifalardan biri hisoblanadi. Xizmatlar uchun zamonaviy bo‘lmagan to‘lovlar hamda qarzdorlikni kuzatishning samarasiz usullari kommunal tizimning yangilanishiga xalaqit bermoqda. Natijada hamma — boshqaruv kompaniyalari, ta’minotchi tashkilotlar, aholi hamda biznes yutqizmoqda. Yagona billing tizimining joriy qilinishi ushbu muammolarni hal etishga qaratilgan.
“Kommunxizmat” agentligining dasturchisi Abdug‘ani Abduraimovning ta’kidlashicha, avtomatik tarzda hisoblash va to‘lovni amalga oshirish anchadan beri amalda. Biroq ular yagona tizimga birlashtirilmagan edi. Joriy yil davomida suv ta’minoti hamda kanalizatsiya billing tizimiga o‘tkaziladi. Hozirda billing tizimiga Toshkent shahri, Toshkent hamda Xorazm viloyati ulangan. Surxondaryo viloyatining tizimga ulanishi 1-iyun kuni yakunlanadi, 2017-yil oxiriga qadar barcha viloyatlarning ulanishi rejalashtirilmoqda.
Xizmat o‘z ichiga ijara haqini, kommunal xizmatlar to‘lovini, kvitansiyalar nusxasini chop etishni, xizmatlar to‘lovini bank kartalari yordamida amalga oshirishni oladi.
Izoh (0)