Qonunchilik palatasi deputatlari va Senat a’zolari Andijon viloyatining Baliqchi tumanida islohotlar amalga oshirilishi bilan tanishdi, aholi bilan muloqotlar o‘tkazdi. O‘rganishlar natijasi xalq deputatlari Baliqchi tumani Kengashi sessiyasida muhokama qilindi. Bu haqda O‘zA xabar bermoqda.
Parlament a’zolari tumandagi davlat idoralari, ijtimoiy soha obyektlari, shuningdek, 50 ga yaqin mahalla fuqarolar yig‘inidagi qariyb 900 xonadonda bo‘ldi.
Tahlillarga ko‘ra, bugungi kunda tuman aholisini ko‘proq uy-joy, kommunal, transport, yo‘l qurilishi, sog‘liqni saqlash, ishga joylashish, pensiya va nafaqa ta’minoti, bank-kredit sohalari bilan bog‘liq muammolar qiynamoqda.
Muloqotlar davomida ana shu va boshqa yo‘nalishlarda fuqarolar tomonidan ko‘tarilgan masala va muammolarning 60 tasi joyida hal etildi, 38 masalani viloyat, 8 masalani mamlakat darajasida hal etish bo‘yicha tegishli tartibda deputatlik va senatorlik so‘rovlari kiritildi.
Tumanda 63 kilometrdan iborat piyodalar yo‘lakchasi mavjud, shundan 16 kilometri ta’mirtalab, mavjud 89 bekatdan 45 tasini qayta barpo etish, shuningdek, 4 ta ko‘prikda ta’mirlash ishlarini bajarish, 45 kilometr yo‘lni qayta qurish lozim. Shuningdek, 22 foydalanilmay turgan bino va inshoot, ular joylashgan 6,6 gektar yer maydonidan unumli foydalanish, ularni “nol” qiymatda tadbirkorlik subyektlariga berish maqsadga muvofiqligi ta’kidlandi.
Sessiyada aholining haqli e’tiroziga sabab bo‘layotgan tibbiy va savdo xizmati ko‘rsatish, ta’lim, ayniqsa, maktabgacha ta’lim muassasalari ishini yaxshilash, elektr energiyasi, ichimlik suvi ta’minoti sohalaridagi ahvol, shuningdek, uy-joy mulkdorlari shirkati, obodonlashtirish idoralari mutasaddilarining mas’uliyatsizligi tanqid qilindi.
Izoh (0)