Bangladeshning Nyu-Yorkdagi bosh konsuli o‘rinbosari Muhammad Shahidulislomga odamlar kontrabandasi va xizmatkoriga nisbatan jismoniy kuch ishlatishda ayblov e’lon qilindi. Bu haqda “Vesti.ru” xabar bermoqda.
Konsul o‘rinbosari 12-iyun Nyu-Yorkning Kvins tumani sudi qarshisida hozir bo‘ldi. Cheklangan diplomatlik daxlsizligiga ega Muhammad Shahidulislomning pasporti olib qo‘yildi.
Prokuraturaga ko‘ra, u AQSh hududiga Bangladesh fuqarosi Muhammad Aminni noqonuniy olib keladi. Shundan so‘ng uning pasportini olib qo‘yib, oilasi uchun kuniga 18 soat davomida bepul ishlashga majbur qiladi, vaqti-vaqti bilan kaltaklab turadi. Unga bo‘ysunmagan va AQShni tark etishga uringan taqdirda esa Bangladeshda qolgan oila a’zolarini o‘ldirish bilan tahdid etadi.
Bangladesh elchixonasi o‘z xodimiga nisbatan ayblovlarni rad etdi va xizmatkor u bilan shartnoma uzaytirilmaganidan so‘ng Muhammad Shahidulislomga tuhmat qilganini bildirdi.
Sud tomonidan ishning ko‘rib chiqilishi iyun oxirida boshlanadi. Aybdor deb topilgan taqdirda diplomat 15 yil muddatga qamalishi mumkin.
Izoh (0)