Vladimir Putin amerikalik rejissor Oliver Stounga bergan intervyusida Rossiyani boshqarish va mamlakat uchun mas’uliyatni o‘z zimmasiga olish qarorini qanday qabul qilgani to‘g‘risida gapirdi, deb yozadi “RBK”.
Davlat rahbari aytishicha, u 1999-yilda Rossiyaning o‘sha vaqtdagi prezidenti Boris Yelsinning hukumatni boshqarish va keyinchalik davlat rahbari lavozimiga nomzodini qo‘yish taklifiga darhol rozilik bermagan. “Bu borada bir qarorga kelish men uchun oson bo‘lmagan, chunki, shu jumladan, o‘z oilam xavfsizligini o‘ylaganman”, — dedi u.
“Men bu juda katta mas’uliyat ekanligini, bu butun hayotimni o‘zgartirib yuborishi mumkinligini va bunga tayyor ekanligimga ishonchim komil emasligini aytdim”, — dedi Putin.
“O‘sha paytda Rossiya uchun mas’uliyatni o‘z bo‘yniga olish — juda qiyin ish edi. Va ochig‘ini aytganda, men prezident Yelsinning menga nisbatan yakuniy rejalari qanaqa ekanligini bilmasdim, bu faoliyatim qancha davom eta olishini ham bilmasdim, chunki har qanday lahzada menga kelib, bo‘shsan, deyishlari mumkin edi. Va o‘shanda men faqat bitta narsa haqida — bolalarimni qayerga yashirish haqida o‘ylardim”, — dedi prezident.
Izoh (0)