Samvel Babayan jamoasini mag‘lub etgan Eron JCh—2018 chiptasini qo‘lga kiritdi

Karlush Keyrush boshqaruvidagi Eron milliy terma jamoasi 2018-yil Rossiyada bo‘lib o‘tadigan futbol bo‘yicha Jahon chempionatida ishtirok etdi.

Saralashning 8-turida O‘zbekiston termasini qabul qilgan eronliklar Sardor Azmun va Mehdi Taremiyning yagona goli evaziga muvaffaqiyat qozondi. Ortda qolgan sakkiz uchrashuvning 6 tasida forslarning qo‘li baland keldi va 2 tasida g‘olibni aniqlab bo‘lmadi. Keyrush jamoasi sakkiz uchrashuvning barchasini quruq seriya bilan o‘tkazdi va gol o‘tkazib yubormadi. O‘zbekistonga qarshi uchrashuvda Mas’ud Shojaiy penaltidan aniq foydalana olmadi.

Bunga qadar Braziliya terma jamoasi Janubiy Amerika mamlakatlari orasidan birinchi bo‘lib mundial missiyasini hal qilgandi. Eron osiyoliklar ichida birinchi bo‘ldi.

Ertaga — 13-iyun Janubiy Koreya va Qatar termalari o‘zaro kurash olib boradi. Mazkur bellashuvdagi ehtimoliy g‘alaba koreyaliklarning O‘zbekistondan 4 ochko ilgarilab ketishiga zamin yaratishi mumkin.

Samvel Babayan boshchilik qilayotgan O‘zbekiston milliy terma jamoasi Toshkentdagi dastlabki o‘yinda ham forslardan mag‘lubiyat qabul qilib olgandi — 0:1. Jamoa, shuningdek, Seulda Janubiy Koreyaga imkoniyatni boy bergan — 1:2. Asosiy raqiblaridan birorta ham ochko ishlamagan bo‘lsa-da, o‘zbekistonlik futbolchilar Jahon chempionatiga yo‘l olish imkoniyatini yo‘qotganicha yo‘q. Ko‘rinishidan kurash so‘nggi turlarga qadar davom etadi.

JCh—2018. Saralash “A” guruhi. 8-tur 12-iyun, dushanba

Eron — O‘zbekiston 2:0

Eron: Alirizo Biyronvand — Milad Muhammadiy, Jalol Husayniy, Said Izzatullohiy, Mas’ud Shojaiy (Ashkan Dejaga, 70), Murtazo Puraliganjiy, Ali Karimiy, Mehdi Taremiy, Alirizo Jahonbahsh, Sardor Azmun, Ramin Rizoiyon.

O‘zbekiston: Aleksandr Lobanov — Akmal Shorahmedov, Yegor Krimets, Anzur Ismoilov, Stanislav Andreyev (Davron Hoshimov, 5), Aziz Haydarov, Vadim Afonin (Sardor Rashidov, 53), Eldor Shomurodov, Odil Ahmedov, Igor Sergeyev, Temurxo‘ja Abduxoliqov (Jaloliddin Masharipov, 65).