Shavkat Mirziyoyev EXPO–2017 xalqaro ko‘rgazmasi ochilish marosimida ishtirok etdi. Bu haqda O‘zA xabar bermoqda.
Ko‘rgazmada O‘zbekiston, Rossiya, AQSh, Xitoy, Germaniya, Buyuk Britaniya, Fransiya, Yaponiya, Janubiy Koreya, Turkiya, Hindiston, Vyetnam, Armaniston, Pokiston, Ozarbayjon, Belarus, Kuba, Turkmaniston, Ruminiya, Braziliya singari 120 dan ortiq davlat o‘zining texnologik, ilmiy, madaniy yutuqlarini namoyish etmoqda.
9-iyun kuni EXPO–2017 xalqaro ko‘rgazmasining tantanali ochilish marosimi bo‘ldi. Marosimda O‘zbekiston Respublikasi Prezidenti Shavkat Mirziyoyev ishtirok etdi.
Ko‘rgazmaning asosiy mavzusi “Kelajak energiyasi” deb nomlangan. Ko‘rgazmada O‘zbekiston faol ishtirok etayotgangani ekspertlar tomonidan e’tirof etilmoqda. Mamlakatda ishlab chiqarilgan mahsulotlarning namoyishi uchun ikki qavatli bino ajratilgan.
O‘zbekiston pavilyonining birinchi qavati 630 kvadrat metr maydonni egallagan. Bu yerda quyosh, shamol va suv, ya’ni kelajak energiyasi mahsulotlari namoyish etilmoqda.
Umumiy maydoni 550 kvadrat metrni tashkil etgan ikkinchi qavatda O‘zbekistonning transport va logistika, turizm sohalari hamda oziq-ovqat, vino va sharbat tayyorlash sanoatida erishilgan yutuqlar, milliy taomlarimiz namoyish etilmoqda.
Izoh (0)