Шавкат Мирзиёев EXPO–2017 халқаро кўргазмаси очилиш маросимида иштирок этди

Шавкат Мирзиёев EXPO–2017 халқаро кўргазмаси очилиш маросимида иштирок этди. Бу ҳақда ЎзА хабар бермоқда.

Кўргазмада Ўзбекистон, Россия, АҚШ, Хитой, Германия, Буюк Британия, Франция, Япония, Жанубий Корея, Туркия, Ҳиндистон, Вьетнам, Арманистон, Покистон, Озарбайжон, Беларусь, Куба, Туркманистон, Руминия, Бразилия сингари 120 дан ортиқ давлат ўзининг технологик, илмий, маданий ютуқларини намойиш этмоқда.

9 июнь куни EXPO–2017 халқаро кўргазмасининг тантанали очилиш маросими бўлди. Маросимда Ўзбекистон Республикаси Президенти Шавкат Мирзиёев иштирок этди.

Кўргазманинг асосий мавзуси «Келажак энергияси» деб номланган. Кўргазмада Ўзбекистон фаол иштирок этаётгангани экспертлар томонидан эътироф этилмоқда. Мамлакатда ишлаб чиқарилган маҳсулотларнинг намойиши учун икки қаватли бино ажратилган.

Ўзбекистон павильонининг биринчи қавати 630 квадрат метр майдонни эгаллаган. Бу ерда қуёш, шамол ва сув, яъни келажак энергияси маҳсулотлари намойиш этилмоқда.

Умумий майдони 550 квадрат метрни ташкил этган иккинчи қаватда Ўзбекистоннинг транспорт ва логистика, туризм соҳалари ҳамда озиқ-овқат, вино ва шарбат тайёрлаш саноатида эришилган ютуқлар, миллий таомларимиз намойиш этилмоқда.